قازاقستان سىرتقى ىستەر مينيسترلىگى قىتايدىڭ سولتۇستىك باتىسىنداعى شىڭجاڭ ايماعىنداعى "ساياسي قايتا تاربيەلەۋ لاگەرىندە" قانشا ەتنيكالىق قازاق بار ەكەندىگىن بىلمەيتىنىن جەتكىزدى. ونىڭ سەبەبى لاگەردەگىنىڭ بارلىعى - قىتاي ازاماتتارى - دەپ حابارلايدى ورتالىق ازيا جاڭالىقتار قىزمەتى.

ءسىم 1963 جىلى قابىلدانعان ۆەنا كونۆەنتسياسىنا سىلتەمە جاساپ، بۇل قۇجات بويىنشا حالىقارالىق قارىم-قاتىناستا وزگە مەملەكەت ءبىر مەملەكەتتىڭ ىشكى ىسىنە ارالاسپايدى دەدى. «قازاقستان قىتاي ازاماتتارى بولىپ تابىلاتىن ەتنيكالىق قازاقتاردىڭ پروبلەماسىنا ارالاسا المايدى» دەپ جاۋاپ بەردى.

سونىمەن بىرگە ءسىم مالىمەتىنشە، 2018 جىلى قىتايدا تۇراتىن 14324 ەتنيكالىق قازاق، 2019 جىلدىڭ العاشقى ءتورت ايىندا 1929 ەتنيكالىق قازاق قازاقستان ازاماتتىعىن العان.

"قازاقستان سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ دەرەگىنشە، 2019 جىلدىڭ 1-ءشى قاڭتارى مەن 15-ءشى مامىرى ارالىعىندا قىتايداعى 6506 ەتنيكالىق قازاق (قىتاي ازاماتتارى) قازاقستاندا تۇراتىن تۋىستارىنا كەلۋ ءۇشىن ۆيزا الدى. ال مينيسترلىككە قىتايدان قازاقستانعا كەلۋ ءۇشىن كومەك سۇراعان 343 ءوتىنىش ءتۇستى" دەپ جازىلعان سىرتقى ىستەر مينيسترلىگىنىڭ جاۋابىندا.

مينيسترلىكتىڭ مالىمدەۋىنشە، "قىتاي كوشى-قون زاڭناماسىن بۇزعان ەتنيكالىق قازاقتار قازاقستانعا شىعا الماي وتىر. قىتاي كوشى-قون رەجيمىن بۇزباعان ەتنيكالىق قازاقتارعا بەيجىڭ تاراپىنان كەدەرگى جوق".

2017 جىلدان باستاپ شىڭجاڭ ايماعىندا تۇراتىن ەتنيكالىق قازاقتار ساياسي تاربيەلەۋ ورتالىقتارىنا قامالىپ جاتقانى جايلى حابار تاراي باستاعان. قازاقستانداعى قازاقتار قىتايدا قالعان تۋىستارىنا قىسىم جاسالىپ جاتقانىن ايتىپ، بيلىكتەن كومەك سۇراعان. قازاقستان سىرتقى ىستەر مينيسترلىگى قىتايداعى قازاقتارعا كومەك قولىن سوزاتىنىن مالىمدەگەن.

"The Qazaq Times"