Wlarbek Däleywlı. Aqın

Biz keş qaldıq pa deymin. Tım keş qaldıq-au, osı...

Erte bastalğan köş bwydası osı künge deyin türilmegende biraz bauır Elde jürer edi.
Qıtay biligi jaqında «Qatañ soqqı beru qozğalısı» (严打革命) jäne «Qaraqoldardı sıpırıp, zorekerlerdi joğaltu» wranı (扫黑除恶) ayasında qatañ şaralar qabıldap, «qoğamdı odan äri tazalau» jwmısın bastap ketti. Qıtay sayttarın aqtarsañız, ne bir swmdıqtarğa kez bolasız.
«kommunistik partiyanıñ ornıqtılığın saqtau» maqsatında, anığı, Şi Jinpiıñnıñ biligin wzaq uaqıtqa qauipsiz etu üşin külli memleket boyınşa qıbıldanğan mına zañ endi ol jaqtağı qazaqtıñ soñğı serpigen twyağın da qiıp tüser türi bar.
Joğarıda aytılğanday, «Qaraqoldardı sıpırıp, zorekerlerdi joğaltu» wranı – eñ aldımen ondağı Qazaqqa auır tigeli twr. Sebebi köp-aq. Sonıñ bastısı – ol jaqtağı 2 jarım millionnan astam qazaqtıñ biik ruhı äli joyıla qoyğan joq. Esesin eşkimge oñay jibere salmaydı.
Endi säl qarsılıq körsetken qandastarımız auır jazalarğa tartılıp, tiri şığu mümkindigi şamalı türmelerge qamaladı.
Keşe ğana, 31 naurız küni Altay aymağınıñ Şiñgil audanında qazaqtıñ ruhtı, batır, serke azamattarına oqılğan sot ükimi bwl sözimizge anıq dälel.
Bwrınğı sıltauı din edi. Endi bwzaqılardı qwrtamız degendi jeleu etip, aşıq qamauğa köşip qana qoymay, kädimgi sot arqılı wzaq jıldarğa jiberu mümkindigi küşeydi.
Öz amandığı üşin eşteñeden ayanbaytın olar türmelerdi köptep salıp, jazası auır degenderin atu jazasına kese beredi.
Resmi sanaq boyınşa Qazaq eline qıtaydan kelgen qazaqtar sanı 300 mıñ töñireginde. Al, ol jaqta qalğan qandastar sanı 2 jarım millionan asadı. Jalpı sanı Moñğoliyadağı halıq sanına tayap jığıladı. Demek, bir şağın memleket qwra alatın halıq, yağni, qanı bir Qazaq bauırlarımız qıtaydıñ zwlımdıq torında, aşıq tepkisinde jatır degen söz.
Täuelsizdikten bergi 30 jılğa juıq uaqıtta köp bölimi köşip kelip te alar edi. Oğan qulığına qwrıq, swmdığına sırıq boylamaytın qıtay sayasatı ırıq bermedi. Jüz mıñdağan jastardı jwmıspen qamtıp, kreditke wzaq jılğa baspana berip, barşa jwrttı qarızğa budı. Jıltıraq, aldamşı sayasat jürgizip eldiñ közin bayladı.
«qıtaydıñ qarızın qaytarıp, üy-jayımızdı satıp, säl esimizdi jinap, qarjılay köşeyip alıp barayıq» dep qwlaştı keñge salıp jürgende zaman bwlay qwbıldı.
Ätteñ deymiz. Älemdegi üş eldiñ biri bolıp, öz qandasın bauırına tartqan bizdiñ Qazaq Eli edi. qandağı beyğamdıq pa, qazaqı jaybasarlıq pa, eñ negizgi, eñ qanı qoyu bauırlarımız qıtay sayasatınıñ torınan erte şığıp, Elge keluge ülgirmey qaldı.
Biz keş qaldıq pa deymin. Tım keş qaldıq-au osı...

“The Qazaq Times”