ۇلاربەك دالەيۇلى. اقىن

ءبىز كەش قالدىق پا دەيمىن. تىم كەش قالدىق-اۋ، وسى...

ەرتە باستالعان كوش بۇيداسى وسى كۇنگە دەيىن تۇرىلمەگەندە ءبىراز باۋىر ەلدە جۇرەر ەدى.
قىتاي بيلىگى جاقىندا «قاتاڭ سوققى بەرۋ قوزعالىسى» (严打革命) جانە «قاراقولداردى سىپىرىپ، زورەكەرلەردى جوعالتۋ» ۇرانى (扫黑除恶) اياسىندا قاتاڭ شارالار قابىلداپ، «قوعامدى ودان ءارى تازالاۋ» جۇمىسىن باستاپ كەتتى. قىتاي سايتتارىن اقتارساڭىز، نە ءبىر سۇمدىقتارعا كەز بولاسىز.
«كوممۋنيستىك پارتيانىڭ ورنىقتىلىعىن ساقتاۋ» ماقساتىندا، انىعى، شي جينپيىڭنىڭ بيلىگىن ۇزاق ۋاقىتقا قاۋىپسىز ەتۋ ءۇشىن كۇللى مەملەكەت بويىنشا قىبىلدانعان مىنا زاڭ ەندى ول جاقتاعى قازاقتىڭ سوڭعى سەرپىگەن تۇياعىن دا قيىپ تۇسەر ءتۇرى بار.
جوعارىدا ايتىلعانداي، «قاراقولداردى سىپىرىپ، زورەكەرلەردى جوعالتۋ» ۇرانى – ەڭ الدىمەن ونداعى قازاققا اۋىر تيگەلى تۇر. سەبەبى كوپ-اق. سونىڭ باستىسى – ول جاقتاعى 2 جارىم ميلليوننان استام قازاقتىڭ بيىك رۋحى ءالى جويىلا قويعان جوق. ەسەسىن ەشكىمگە وڭاي جىبەرە سالمايدى.
ەندى ءسال قارسىلىق كورسەتكەن قانداستارىمىز اۋىر جازالارعا تارتىلىپ، ءتىرى شىعۋ مۇمكىندىگى شامالى تۇرمەلەرگە قامالادى.
كەشە عانا، 31 ناۋرىز كۇنى التاي ايماعىنىڭ شىڭگىل اۋدانىندا قازاقتىڭ رۋحتى، باتىر، سەركە ازاماتتارىنا وقىلعان سوت ۇكىمى بۇل سوزىمىزگە انىق دالەل.
بۇرىنعى سىلتاۋى ءدىن ەدى. ەندى بۇزاقىلاردى قۇرتامىز دەگەندى جەلەۋ ەتىپ، اشىق قاماۋعا كوشىپ قانا قويماي، كادىمگى سوت ارقىلى ۇزاق جىلدارعا جىبەرۋ مۇمكىندىگى كۇشەيدى.
ءوز اماندىعى ءۇشىن ەشتەڭەدەن ايانبايتىن ولار تۇرمەلەردى كوپتەپ سالىپ، جازاسى اۋىر دەگەندەرىن اتۋ جازاسىنا كەسە بەرەدى.
رەسمي ساناق بويىنشا قازاق ەلىنە قىتايدان كەلگەن قازاقتار سانى 300 مىڭ توڭىرەگىندە. ال، ول جاقتا قالعان قانداستار سانى 2 جارىم ميلليونان اسادى. جالپى سانى موڭعولياداعى حالىق سانىنا تاياپ جىعىلادى. دەمەك، ءبىر شاعىن مەملەكەت قۇرا الاتىن حالىق، ياعني، قانى ءبىر قازاق باۋىرلارىمىز قىتايدىڭ زۇلىمدىق تورىندا، اشىق تەپكىسىندە جاتىر دەگەن ءسوز.
تاۋەلسىزدىكتەن بەرگى 30 جىلعا جۋىق ۋاقىتتا كوپ ءبولىمى كوشىپ كەلىپ تە الار ەدى. وعان قۋلىعىنا قۇرىق، سۇمدىعىنا سىرىق بويلامايتىن قىتاي ساياساتى ىرىق بەرمەدى. ءجۇز مىڭداعان جاستاردى جۇمىسپەن قامتىپ، كرەديتكە ۇزاق جىلعا باسپانا بەرىپ، بارشا جۇرتتى قارىزعا بۋدى. جىلتىراق، الدامشى ساياسات جۇرگىزىپ ەلدىڭ كوزىن بايلادى.
«قىتايدىڭ قارىزىن قايتارىپ، ءۇي-جايىمىزدى ساتىپ، ءسال ەسىمىزدى جيناپ، قارجىلاي كوشەيىپ الىپ بارايىق» دەپ قۇلاشتى كەڭگە سالىپ جۇرگەندە زامان بۇلاي قۇبىلدى.
اتتەڭ دەيمىز. الەمدەگى ءۇش ەلدىڭ ءبىرى بولىپ، ءوز قانداسىن باۋىرىنا تارتقان ءبىزدىڭ قازاق ەلى ەدى. قانداعى بەيعامدىق پا، قازاقى جايباسارلىق پا، ەڭ نەگىزگى، ەڭ قانى قويۋ باۋىرلارىمىز قىتاي ساياساتىنىڭ تورىنان ەرتە شىعىپ، ەلگە كەلۋگە ۇلگىرمەي قالدى.
ءبىز كەش قالدىق پا دەيمىن. تىم كەش قالدىق-اۋ وسى...

“The Qazaq Times”