«Jınımdı keltirmeşi»: Su jaña ministr aşulı äriptesine qatıstı mälimdeme jasadı

Su jaña Wlttıq ekonomika ministri Ruslan Dalenov: «Halıq özgeristerdi sezinui tiis» - dep mälimdedi.

Ükimet otırısınan keyin jurnalister swrağına jauap bergen Ruslan Dalenov tarifterdiñ arzandauına qatıstı mälimdeme jasadı.

«Şağımdanıñızdar, men ärbir mäseleni öz baqılauıma alamın. Sebebi bağalar jospar boyınşa arzandauı kerek. Halıq özgeristerdi sezinui tiis» - dedi Dalenov.

Ministrdiñ aytuınşa, tarifter jospar boyınşa arzandauda. Ol öziniñ bwl sözine dälel retinde ükimet otırısına Astana qalasınıñ twrğındarına kommunaldı qızmet türlerin tölegende beriletin tübirtektiñ köşirmesin alıp kelgen.

«Men keşe poşta jäşiginen tübirtekti aldım. Onı äli qarağan joqpın. Dese de, aytayın: Elektr energiyasınıñ tarifi bwğan deyin 15,32 teñge bolğan, qazir 13, 89 teñgege yağni 10 payzğa arzandağan. Bwl Astana boyınşa. Mende barlıq jerde 10 payız.  Jılu tarifi 3097 teñge bolğan. Qazir 2788 teñge. Bwl jerde de 10 payız jäne bwl osılay kete beredi. Eger osılay bolmasa, tikeley mağan şağımdanıñızdar. Bwl mäseleni men öz baqılauıma alamın» - dep mälimdedi su jaña ministr.

Bwdan bölek Dalenovqa «jınına ie bola almay jürgen» atı şulı Wlttıq ekonomika vice-ministri Serik Jwmanğaringe qatıstı swraq qoyıldı.

Dalenov atalmış mäselege qatıstı ministrlikte qabıldanğan şaralar jöninde ayta kele: «Meniñ oyımşa, qanday jağday bolsa da dwrıs jauap bermeuge bolmaydı. Biz bwndaydıñ aldın aluımız qajet. Atalmış oqiğağa baylanıstı biz ministrlikte tiisti tüsindiru jwmıstarın jürgizdik. Bwnday jwmıs barlıq memlekettik organdarğa qajet dep esepteymin. Biz jurnalisterdiñ, BAQ ökilderiniñ jay swraq qoymaytının tüsinemiz. Bwl qoğamnıñ, halıqtıñ swrağı. Biz oğan sıylastıqpen qaraymız» - dep ağınan jarıldı.

Esteriñizde bolsa, osıdan biraz uaqıt bwrın Jwmanğarin jurnalisterdiñ tarifterdiñ arzandauına qatıstı saualına: «Sizder mına jerge menen tarifter jöninde swyrauğa keldiñizder me? Mağan resmi türde keliñizder. Men sizderge tarifter jöninde basınan ayağına deyin aytıp beremin. Jınımdı keltirmeñizşi» - dep jauap bergen.

"The Qazaq Times"