Prem'er Asqar Mamin jäne ministr Erbol Qaraşökeev. 18 tamız 2021 jıl. Foto: aptalıq ükimet otırısınıñ efirinen skrin-suret / QR Ükimeti

Mamin arağa birneşe ay ozdırıp Auıl şaruaşılığı ministrligi men äkimdikterge Mañğıstau men Qızılorda öñirindegi jağdaydı nazarda wstaudı, küzgi jiın-terimge qamdanudı tapsırdı.

18 tamızda ötken ükimet otırısında qwrğaqşılıqtıñ «saldarın joyu üşin jedel şaralar qabıldandı» degen ükimet basşısınıñ sözin äleumettik jeli qoldanuşıları «eñbekti maldanğış şeneunikterdiñ eski ädeti» retinde sınap jatır. Quañşılıqtan janı qısılğan jwrtqa Ükimetten bwrın bayağışa jer-jerden el azamattarı asarlatıp, jılu jinap kömek wyımdastırğanı belgili.

Prem'er-ministrdiñ aytuınşa, jem-şöp satıp alu üşin Ükimet rezervinen Mañğıstau jäne Qızılorda oblıstarına 3,6 mlrd teñge, al jem–şöp dayındauğa qosımşa 43,1 mıñ tonna arzan dizel' otını bölingen.

 «Qabıldanğan şaralardıñ arqasında jem-şöppen qamtamasız etu mäselesi jalpı twraqtaldı. Auıl şaruaşılığı ministrligi men äkimdikter osı bağıttağı jwmıstı jalğastırıp, jağdaydı erekşe baqılauda wstauı qajet. Egin jinauğa dayındıq mäselesinde de qarjılay jäne materialdıq-tehnikalıq qamtamasız etu boyınşa barlıq şarua qolğa alındı», – deydi ol.

Asqar Maminniñ boljauınşa, Qazaqstan astıqtan tarıqpaydı, özin tolıq qamtamasız ete aladı. Eksporttıq äleuet joğarı deñgeyde, 6,5-7 mln tonna köleminde qala bermek.

«Sondıqtan bastı mindetimiz – egin jinaudı uaqtılı äri sapalı ötkizu. Jalpı mınaday mäselelerge köñil bölgim keledi. Birinşiden, Auıl şaruaşılığı ministrligi men oblıstardıñ äkimdikteri qıs mezgiline jem-şöp qorın sapalı dayındau jäne onıñ bağaların twraqtı boluın qamtamasız etsin.Ekinşiden, egindi sapalı jinap qana qoymay, biday öinimin dwrıs saqtau şartın baqılasın.Sonday-aq, elevatorlardıñ egin qabıldau men jinauğa äzirligin qamtamasız etu qajet. Üşinşiden, Energetika ministrligine egin jinau kezinde janar-jağar maymen uaqtılı qamtamasız etu mäselesin twraqtı baqılaudı tapsıramın», – dedi ol.

Biıl, Qazaqstan Täuelsizdiginiñ 30 jıldığı qarsañında oñtüstik-batıs aymaqtarda bwrın-soñdı bolmağan qwrğaqşılıq jaylap, jem-şöp jetispeuşiliginen jwrttıñ qoldağı malı qınaday qırılıp qaldı. Soğan qaramastan jauaptı mekemeler, sonıñ işinde eki oblıstıñ äkimdigi, TJD jäne Qazgidromet jwt juandağan aymaqtarda TJ jariyalauğa negiz joq degen toqtamğa keldi. Azamattardıñ bir böligi alapat jwttıñ boların der kezinde bağamdap-qamdanıp ülgermegen Ükimetti  ayıptaydı. Bwl jöninde özine şañ juıtpağan auıl şaruaşılığı ministri Saparhan Omarov şildede otstavkağa ketti. Öñirdegi halıq äli de qolı kömekke jetpegenin aytadı.

Respublikalıq jedel ştabtıñ jwmısı ayqın emes nemese aşıq derekközderde jüyeli körsetilmeydi. Jwttıñ zardabı etek alıp, qoğam sının küşeytken soñ jem-şöpti sırtqa şığaruğa tıyım salındı.

The Qazaq Times