Ötken tüni Astana qalasındağı jeke twrğınüylerdiñ birinde bolğan ört saldarınan bes birdey büldirşin köz jwmdı. Äleumettik jeliler men BAQ betterinde qayğılı oqiğağa qabırğası qayısıp, köñil aytqan jwrttıñ sanında esep joq. Biraq bwl jwrt nazarına ilikken bir ğana oqiğa. Osı siyaqtı elimizde jıl sayın qanşama oqiğa bolıp jatır.

Tanımal bloger, azamattıq belsendi Aygül Orınbek Astanada bolğan bes büldirşiniñ ölimine Eñbek jäne halıqtı äleumettik qorğau ministri Madina Äbilqasıova kinäli dep esepteydi. Ol öziniñ «Facebook» paraqşasına: «Madina Äbilqasımova bes balanıñ ölimi seniñ moyınıñda» - dep jazdı.

Aygül hanımnıñ bwl pikirimen bireu keliser, bireu kelispes, mäsele onda emes. Mäsele, däl osınday oqiğanıñ Qazaqstannıñ bir tükpirinde emes, Astananıñ qaq ortasında boluında jäne «eki attasa» jetetin jerge «köp balalı analar millioner bolıp kete me» dep alañdaytın ministrdiñ äli jete almay jatqanında...

Tötenşe jağdaylar komitetiniñ mälimetinşe, 2017 jılı Respublika boyınşa, 15 mıñ ört oqiğası tirkelip, 352 adam köz jwmıp, 816 adam türli dene jaraqattarın alğan. Ört oqtiğalarınıñ 68 payızı jeke twrğın üy audandarına tiesili. 2017 jılı jeke twrğın üy audandarında 10 mıñ ört oqiğası tirkelgen. (Eki jıl bwrınğı statistika keşegi oqiğadan keyin anau aytqanday özgerip ketti dep aytu qiın).

Bwl statistika neni körsetedi? Tötenşe jağdaylar komitetine söz berseñ, olar barlığına halıqtıñ özin kinäläydi. TJK-niñ kez kelgen ört oqiğasına ejelden qalıptasqan bir ğana jauabı bar. Ol – «twrğındar ört qauipsizdigin saqtamaydı», «elektr jüyeleri dwrıs ornalaspağan» t.t. Biraq mäsele osıda ğana ma? Joq ärine. Bwl jerde «ört qauipsizdiginen bwrın» birinşi orında halıqtıñ äleumettik-ekonomikalıq jağdayı twr. Anası jeti qarañğı tünde balaların tastap, jwmısqa ketse, «16 mıñ teñge» jetpeytindigi anıq. Sizder «Şanel'» kiesizder me, joq älde «Armani» kiesizder me onda bizdiñ şaruamız joq. Qazir bireudiñ garderobı emes, «balapandarın» asıraymın dep jürip, qapıda bes birdey «bauır eti» balasınan ayırılıp qalğan ananıñ tağdırı köbirek alañdatadı jwrttı. Joğarıda aytqanımızday, bwl qoğam nazarına ilingen bir ğana oqiğa. Elimizde prezident Nazarbaev aytqanday, ayına «500 mıñ teñge» tappaytın, bala-şağasınıñ bolaşağı üşin emes, bir kündik nanı üşin ömirmen alparısıp jürgen qanşama ana, qanşama äke bar. Bes büldirşinniñ ölimi örtten be, joq älde äleumettik jağdaydıñ tömendiginen me?

Esti ministrler elge jaqındaymın dese, osını oylağanı abzal...

"The Qazaq Times"