فوتو: ازاتتىق راديوسى.

وتكەن ءتۇنى استانا قالاسىنداعى جەكە تۇرعىنۇيلەردىڭ بىرىندە بولعان ءورت سالدارىنان بەس بىردەي ءبۇلدىرشىن كوز جۇمدى. الەۋمەتتىك جەلىلەر مەن باق بەتتەرىندە قايعىلى وقيعاعا قابىرعاسى قايىسىپ، كوڭىل ايتقان جۇرتتىڭ سانىندا ەسەپ جوق. بىراق بۇل جۇرت نازارىنا ىلىككەن ءبىر عانا وقيعا. وسى سياقتى ەلىمىزدە جىل سايىن قانشاما وقيعا بولىپ جاتىر.

تانىمال بلوگەر، ازاماتتىق بەلسەندى ايگۇل ورىنبەك استانادا بولعان بەس ءبۇلدىرشىنىڭ ولىمىنە ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىوۆا كىنالى دەپ ەسەپتەيدى. ول ءوزىنىڭ «Facebook» پاراقشاسىنا: «مادينا ابىلقاسىموۆا بەس بالانىڭ ءولىمى سەنىڭ مويىنىڭدا» - دەپ جازدى.

ايگۇل حانىمنىڭ بۇل پىكىرىمەن بىرەۋ كەلىسەر، بىرەۋ كەلىسپەس، ماسەلە وندا ەمەس. ماسەلە، ءدال وسىنداي وقيعانىڭ قازاقستاننىڭ ءبىر تۇكپىرىندە ەمەس، استانانىڭ قاق ورتاسىندا بولۋىندا جانە «ەكى اتتاسا» جەتەتىن جەرگە «كوپ بالالى انالار ميلليونەر بولىپ كەتە مە» دەپ الاڭدايتىن ءمينيستردىڭ ءالى جەتە الماي جاتقانىندا...

توتەنشە جاعدايلار كوميتەتىنىڭ مالىمەتىنشە، 2017 جىلى رەسپۋبليكا بويىنشا، 15 مىڭ ءورت وقيعاسى تىركەلىپ، 352 ادام كوز جۇمىپ، 816 ادام ءتۇرلى دەنە جاراقاتتارىن العان. ءورت وقتيعالارىنىڭ 68 پايىزى جەكە تۇرعىن ءۇي اۋداندارىنا تيەسىلى. 2017 جىلى جەكە تۇرعىن ءۇي اۋداندارىندا 10 مىڭ ءورت وقيعاسى تىركەلگەن. (ەكى جىل بۇرىنعى ستاتيستيكا كەشەگى وقيعادان كەيىن اناۋ ايتقانداي وزگەرىپ كەتتى دەپ ايتۋ قيىن).

بۇل ستاتيستيكا نەنى كورسەتەدى؟ توتەنشە جاعدايلار كوميتەتىنە ءسوز بەرسەڭ، ولار بارلىعىنا حالىقتىڭ ءوزىن كىنالايدى. تجك-ءنىڭ كەز كەلگەن ءورت وقيعاسىنا ەجەلدەن قالىپتاسقان ءبىر عانا جاۋابى بار. ول – «تۇرعىندار ءورت قاۋىپسىزدىگىن ساقتامايدى»، «ەلەكتر جۇيەلەرى دۇرىس ورنالاسپاعان» ت.ت. بىراق ماسەلە وسىدا عانا ما؟ جوق ارينە. بۇل جەردە «ءورت قاۋىپسىزدىگىنەن بۇرىن» ءبىرىنشى ورىندا حالىقتىڭ الەۋمەتتىك-ەكونوميكالىق جاعدايى تۇر. اناسى جەتى قاراڭعى تۇندە بالالارىن تاستاپ، جۇمىسقا كەتسە، «16 مىڭ تەڭگە» جەتپەيتىندىگى انىق. سىزدەر «شانەل» كيەسىزدەر مە، جوق الدە «ارماني» كيەسىزدەر مە وندا ءبىزدىڭ شارۋامىز جوق. قازىر بىرەۋدىڭ گاردەروبى ەمەس، «بالاپاندارىن» اسىرايمىن دەپ ءجۇرىپ، قاپىدا بەس بىردەي «باۋىر ەتى» بالاسىنان ايىرىلىپ قالعان انانىڭ تاعدىرى كوبىرەك الاڭداتادى جۇرتتى. جوعارىدا ايتقانىمىزداي، بۇل قوعام نازارىنا ىلىنگەن ءبىر عانا وقيعا. ەلىمىزدە پرەزيدەنت نازارباەۆ ايتقانداي، ايىنا «500 مىڭ تەڭگە» تاپپايتىن، بالا-شاعاسىنىڭ بولاشاعى ءۇشىن ەمەس، ءبىر كۇندىك نانى ءۇشىن ومىرمەن الپارىسىپ جۇرگەن قانشاما انا، قانشاما اكە بار. بەس ءبۇلدىرشىننىڭ ءولىمى ورتتەن بە، جوق الدە الەۋمەتتىك جاعدايدىڭ تومەندىگىنەن مە؟

ەستى مينيسترلەر ەلگە جاقىندايمىن دەسە، وسىنى ويلاعانى ابزال...

"The Qazaq Times"