Şendiler baytağın «asırap» otır dep jaldan bosatqısı kelmeytin  Bayqoñırda tağı şu şıqtı. Bwl jolı öñir twrğındarı 31 arnağa özderiniñ reseylik policeylerden jäbir körgenderin aşınıp ayttı.

Naqtıraq aytqanda, Qazaqstan «Jastar jılı», «jastardı qoldaymız, qorğaymız» dep kübinip-kümpiisip toy bastağanda, Araldıñ arqa twsındağı  Bayqoñırda Joldıbay ükimetiniñ jondı policeyleri qazaq jastarın tağı da  aşıq sabadı.

Mwnı «tağı da» dep tarqatqanımız da, jergilikti halıqtıñ uäjinen edi. Olardıñ aytuınşa, soñğı uaqıtta mwnday oqiğa jii qaytalana bastağan. Jergilikti jwrt «beybit künde köşege şığudan qaldıq» deydi.

Mäselen, mwnday «jazağa» Jaswlan Qojantaev esimdi bayqoñırlıq jigit ilikken. Onıñ aytuınşa, dostarımen birge keşki uaqıtta qıdırıp jüredi. Osı kezde policeyler onı men janındağı joldastarın eş sebepsiz ayausız tepkige töseydi. Tipti, betinde tärtip saqşılarınıñ tayağınan ülken isik te qalıp otır.

Ol – ol ma, Jaswlannıñ anasınıñ aytuınşa, Olar wlına atalğan oqiğağa baylanıstı aqparat taramauı üşin qwqay da körsetipti. Al auır  soqqıdan soñ jaraqat alğan Jaswlan büginde auruhanada jatır.

«Wrıp-soğıp işke aparğannan keyin: «Biz seni tañğa deyin wrıp-soğamız nemese osı jerden şığıp, jay ğana qwlap qalğanıñdı aytasıñ», – dep aytqan», – deydi anası Ayzada Qojantaeva.

«Qwlap qalu» demekşi, osı oqiğamen twspa-tws soqqınıñ astında qalğan tağı bir azamat – Mäulen Saylaubaev. Bwl azamattı da tepkige kömip bergen Bayqoñırdağı policeyler. Onıñ sözinşe, bet-auzın twmşalağan tärtip saqşıları jwmısta jürgen jerinen alıp ketken:

«Narkologiyalıq posttıñ aldında köliktiñ bir jağına tığıp wrdı. Jerge jatqızıp wrdı», – deydi Mäulen Saylaubaev.

Osılayşa, täuelsiz otanda aydıñ-künniñ amanında tayaq jegen azamattıñ namısı bir küyse, köziniñ qaraşığın köldeneñ jwrttıñ kögala qoyday ğıp sabağanına Mäulenniñ Anasınıñ namısı eki küyip otır.

«Nege osınday iske jol berilip otır? Nege biz, Qazaqstan azamattarı, öz elimizde, öz jerimizde otırıp, zardap şegemiz? Nege balalar osılay zardap şegedi?» – deydi jäbirlengen jigittiñ anası Ğaziza Täjibaeva.

Al prezidenttiñ Bayqoñır keşenindegi arnaulı ökili Serik Qojaniyazov büginde osı jağdaydıñ män-jayı anıqtalıp jatqanın ayta kelip, bwl oqiğanı orıstardıñ şoqınu merekesimen baylanıstıradı:

«18-19 qañtarda orıstarda şoqınu merekesi boldı ğoy. Soğan baylanıstı tärtip küşeytilgen. Qwjattardı swrağan kezde aralarında teketires bolğan», – deydi ol. 

Bayqoñırdağı bassızdıq bwl ğanama edi?

“The Qazaq Times”