بايقوڭىردا قارا قازاقتى قارۋلى ورىس ساباپ ءجۇر

شەندىلەر بايتاعىن «اسىراپ» وتىر دەپ جالدان بوساتقىسى كەلمەيتىن  بايقوڭىردا تاعى شۋ شىقتى. بۇل جولى ءوڭىر تۇرعىندارى 31 ارناعا وزدەرىنىڭ رەسەيلىك پوليتسەيلەردەن ءجابىر كورگەندەرىن اشىنىپ ايتتى.

ناقتىراق ايتقاندا، قازاقستان «جاستار جىلى»، «جاستاردى قولدايمىز، قورعايمىز» دەپ كۇبىنىپ-كۇمپيىسىپ توي باستاعاندا، ارالدىڭ ارقا تۇسىنداعى  بايقوڭىردا جولدىباي ۇكىمەتىنىڭ جوندى پوليتسەيلەرى قازاق جاستارىن تاعى دا  اشىق سابادى.

مۇنى «تاعى دا» دەپ تارقاتقانىمىز دا، جەرگىلىكتى حالىقتىڭ ۋاجىنەن ەدى. ولاردىڭ ايتۋىنشا، سوڭعى ۋاقىتتا مۇنداي وقيعا ءجيى قايتالانا باستاعان. جەرگىلىكتى جۇرت «بەيبىت كۇندە كوشەگە شىعۋدان قالدىق» دەيدى.

ماسەلەن، مۇنداي «جازاعا» جاسۇلان قوجانتاەۆ ەسىمدى بايقوڭىرلىق جىگىت ىلىككەن. ونىڭ ايتۋىنشا، دوستارىمەن بىرگە كەشكى ۋاقىتتا قىدىرىپ جۇرەدى. وسى كەزدە پوليتسەيلەر ونى مەن جانىنداعى جولداستارىن ەش سەبەپسىز اياۋسىز تەپكىگە توسەيدى. ءتىپتى، بەتىندە ءتارتىپ ساقشىلارىنىڭ تاياعىنان ۇلكەن ىسىك تە قالىپ وتىر.

ول – ول ما، جاسۇلاننىڭ اناسىنىڭ ايتۋىنشا، ولار ۇلىنا اتالعان وقيعاعا بايلانىستى اقپارات تاراماۋى ءۇشىن قۇقاي دا كورسەتىپتى. ال اۋىر  سوققىدان سوڭ جاراقات العان جاسۇلان بۇگىندە اۋرۋحانادا جاتىر.

«ۇرىپ-سوعىپ ىشكە اپارعاننان كەيىن: «ءبىز سەنى تاڭعا دەيىن ۇرىپ-سوعامىز نەمەسە وسى جەردەن شىعىپ، جاي عانا قۇلاپ قالعانىڭدى ايتاسىڭ»، – دەپ ايتقان»، – دەيدى اناسى ايزادا قوجانتاەۆا.

«قۇلاپ قالۋ» دەمەكشى، وسى وقيعامەن تۇسپا-تۇس سوققىنىڭ استىندا قالعان تاعى ءبىر ازامات – ماۋلەن سايلاۋباەۆ. بۇل ازاماتتى دا تەپكىگە كومىپ بەرگەن بايقوڭىرداعى پوليتسەيلەر. ونىڭ سوزىنشە، بەت-اۋزىن تۇمشالاعان ءتارتىپ ساقشىلارى جۇمىستا جۇرگەن جەرىنەن الىپ كەتكەن:

«ناركولوگيالىق پوستتىڭ الدىندا كولىكتىڭ ءبىر جاعىنا تىعىپ ۇردى. جەرگە جاتقىزىپ ۇردى»، – دەيدى ماۋلەن سايلاۋباەۆ.

وسىلايشا، تاۋەلسىز وتاندا ايدىڭ-كۇننىڭ امانىندا تاياق جەگەن ازاماتتىڭ نامىسى ءبىر كۇيسە، كوزىنىڭ قاراشىعىن كولدەنەڭ جۇرتتىڭ كوگالا قويداي عىپ ساباعانىنا ماۋلەننىڭ اناسىنىڭ نامىسى ەكى كۇيىپ وتىر.

«نەگە وسىنداي ىسكە جول بەرىلىپ وتىر؟ نەگە ءبىز، قازاقستان ازاماتتارى، ءوز ەلىمىزدە، ءوز جەرىمىزدە وتىرىپ، زارداپ شەگەمىز؟ نەگە بالالار وسىلاي زارداپ شەگەدى؟» – دەيدى جابىرلەنگەن جىگىتتىڭ اناسى عازيزا تاجىباەۆا.

ال پرەزيدەنتتىڭ بايقوڭىر كەشەنىندەگى ارناۋلى وكىلى سەرىك قوجانيازوۆ بۇگىندە وسى جاعدايدىڭ ءمان-جايى انىقتالىپ جاتقانىن ايتا كەلىپ، بۇل وقيعانى ورىستاردىڭ شوقىنۋ مەرەكەسىمەن بايلانىستىرادى:

«18-19 قاڭتاردا ورىستاردا شوقىنۋ مەرەكەسى بولدى عوي. سوعان بايلانىستى ءتارتىپ كۇشەيتىلگەن. قۇجاتتاردى سۇراعان كەزدە ارالارىندا تەكەتىرەس بولعان»، – دەيدى ول. 

بايقوڭىرداعى باسسىزدىق بۇل عاناما ەدى؟

“The Qazaq Times”