Erlan Jünis, aqın. Jetisu

Zor jalğızdıq

 

Men keyde Ayda otırğan sekildenem,

tım jalğız,

alıstan Jer köriner…

….süymegen, sağınbağan, ökinbegen,

eşqaşan mwñaytpağan jerdegiler.

 

Eşqaşan jolğa wzaq qaramağan,

eşkimdi kütpegen de, qoştaspağan.

Eşkim joq jüregimdi jaralağan,

sebebi, eşkimmen de dostaspağam.

 

Keşkisin teñizge de tas atpağam,

tañerteñ tauğa şığıp oylanbağam.

Eşkimdi ömirimnen bosatpağam,

sebebi, eşkimge de baylanbağam.

 

Eşqaşan sürmegendey keñ ömirdi,

uaqıttan qalmağanmın, ozbağanmın.

Eşkim joq tıñdaytwğın öleñimdi,

sebebi, eşqaşan da jazbağanmın.

 

Kitabın eşteñeniñ jii aqtaram,

tıñdaymın eşqaşannıñ taspasın da…

…Men keyde Ayda otırğan siyaqtanam,

tım jalğız…

köleñkem de joq qasımda!..

 

***

Bir ğajap jüz jıl da bir jannan jalıqpau,

Jalıqpau – jwtudan demin;

Tamızdıñ tüni de boyjetip qalıptı-au,

Wyalşañ oyıñday seniñ…

 

Wyalşaq oylardıñ qwpiyasın aşar kim,

Kim körer qwpiya meñin?..

Oylanıp twr, äne, on segiz jasar tün,

Oylanğan sätiñdey seniñ.

 

On segiz jasar tün, o, netken balğın tün,

O, netken erke edi qwrbıñ?!

Astında jazdağı eñ soñğı jañbırdıñ,

Qasında eñ soñğı güldiñ,

 

Jürdiñder qwstay bop aynala qalıqtap,

Men de ünsiz tamsanıp twrdım.

…Tamızdıñ tüni de boyjetip qalıptı-au,

On segiz jasınday jırdıñ.

 

 

Tüngi birde perzenthanada adasu

 

Qay jerde janı saqtalatın halıqtıñ,

Bildim men,

Perzenthanada adasıp jürip sonı wqtım.

Bwl tüni sezindim –

Adasu degen – janımdı izdeu özimniñ,

Özgeniñ,

Halıqtıñ,

Älemniñ,

Ol, bälkim, janın izdeu me körkem öleñniñ?!

Adasıp jürip bwl tüni perzenthanada,

Bir joyqın dümpu bolğanday jürek, sanada,

Tüsindim, bükil ömirimniñ ğajap şındığın,

Eşqaşan endi adasqım kelmeytindigin.

İzdeumen Süleymen tağın da,

Babıldıñ aspalı bağında,

Adasqım kelmesin Olimptiñ törinde,

Biliktiñ qarañğı dälizderinde,

El'doradonıñ altınmen aptalğan jolında,

Kimeriyadan qwlağan keruenniñ soñında,

Aleksandriyanıñ kitaphanasında da joğalğan,

Qosözen boyında uaqıtqa tonalğan,

Adasqım kelmeydi!

Adasqım keledi

Perzenthanada,

Bir joyqın dümpu bar jürek pen sanada,

Är esikti aşqanda –

Aşılğan jolıqtım şeksiz bir aspanğa,

Jolıqtım bolaşaq ruhımen,

Kelgen bir janday bop ilkiden!

Adasqan janday bop bir baytaq dalada –

Adasıp jürdim men perzenthanada,

Bir kezde taptım da esigin balamnıñ –

Qaytadan jaraldım!

Jaraldım –

Jwldızday jap-jarıq,

Qwdayğa ğaşıq bop,

Älemge tañ qalıp!

 

 

Almatığa barsam meni…

 

Almatığa barsam meni Erlan Jünis qarsı aladı,

Közderinen bilinedi qajığanı, şarşağanı.

 

Bala sındı qalbalaqtap, alıp-wşıp mäz boladı,

Quanğanı – tipti meni jılata da jazdağanı.

 

Meni kütip twrğan sındı jıldar boyı

sol bir mañda,

Köşip kelgen kezi me eken Astana ma,

Jambıldan ba?!

 

Alataudan auğan bwltpen qala işinde birge köşip,

Şaştarına qws wya sap, iığına gülder ösip

 

Ülgeripti!

Ülgeripti şattanıp ta, şerlenip te,

«Balqıbekke barmadıq pa,

Zeyiphandı körmedik pe?», –

 

(deydi mağan, bilmey me eken olar

ketip qalğandığın,

Bilmey me eken aqındarğa jalğan –

eki jalğandığın?!).

 

Mäyhanağa ertip barıp, masayrağan küyge enedi,

«Almatıda qalam deyd, mağan – deydi –

üy beredi».

 

Bilmey me eken talay jıldı –

talay jırdı keşkendigin,

Keşkendigin, öziniñ de Jetisuğa köşkendigin?!

 

Gegel' men Bekondı aytıp,

«oy mänisin tapşı» deydi,

Oqığanıñ – jaman emes,

jır jazğanıñ – jaqsı deymin.

 

Swlulardı sanap şığıp, «eñ swluın tapşı» deydi,

Swlular da – jaman emes,

süygen jarıñ – jaqsı deymin.

 

Aqındardı tizip berip, «eñ wlısın tapşı» deydi,

Wlı aqındar – jaman emes,

jas aqındar – jaqsı deymin.

 

Közderime tiktep qarap, keyin külip jiberedi,

Sol külkiden eske tüser Lermontovtıñ bir öleñi…

 

«Ey, danışpan Erlan Jünis, päli, ğaşıq

Erlan Jünis,

Qalğan jwmıs – jaman emes, jaqsı –

deymin – barğan jwmıs».

 

Men ketemin, ol qaladı, beymälim ne añsağanı,

äldenege tamsanadı, äldeneden tomsaradı…

 

Közderinen bilinedi qajığanı, şarşağanı,

Almatığa barsam meni Erlan Jünis

qarsı aladı…

 

 

..şığar

 

Sonau bir twsta dala bar şığar,

Qala bar şığar sol mañda,

Qamıqqan bir jan qarağan şığar,

Qaytqan izi joq joldarğa.

 

Qamıqqan sol jan bir qalqa şığar,

Lalağa wqsas swlbası.

Jalğız bir janğa mwñ da alqa şığar,

Sağınış şığar sırğası.

 

Jalğızdıq sırın jaña wqqan şığar,

Jadağay oydı jügendep.

Jüregin, bəlkim, auırtqan şığar,

Biz sekildi bir jügermek.

 

Əynegin künge aşpağan şığar,

Sırt qalğan şığar top şınar,

Süygen bir ənin qospağan şığar,

Bige de zauqı joq şığar.

 

Üyin de köpten jimağan şığar,

Swp-suıq şığar bölmesi,

Gülderge su da qwymağan şığar,

Sıylağan bwrın Kelmesi.

 

Men bilsem, solay,

keşip kör sonı,

bwl qıstıñ sırı - sol janda.

...Əytpese, köktem keşikpeuşi edi,

Əudemjer ğana qalğanda.

 

 

Boz

 

…Bir jarıq meken bayqala ma aldan?

Bolmasa, toqta, men tüsem!

Duhanalar men mäyhanalardan

Mwñımdı işem,

Dert işem!

Aldımnan meniñ jarqıldap, külip,

Aqjaynaq qalqa qarsı alar!

Maestro-dos

Sañqıldap twrıp:

«Şayır keldi!» dep jar salar!

Şayır keldi dep, şarabın qwyar,

Qızdıñ ernindey şarabın.

Dayaşı qızdıñ janarında wyañ,

Jalt ete qalar janarım…

Jalt eter säule «ökinbe!» degen,

Ünsizdik – äulie,

söz batar…

Maestro-dos

«Jetimder»

menen

«Ökil äkeni» bozdatar!..

Qozdatar bärin, bozdaydı dünie,

Bozümit, bozoy, bozarman,

Däl mendey öleñ jazbaydı dünie,

Men düniedey jaza alman!

Jaza alğam,

jazğam,

jazıqtı bolğam,

Jasına közdiñ jii aqqan…

Älemniñ mınau näziktigi – ardan,

Mıqtılığı da – wyattan!

…Ey, swlu qızdar, oqıñdar öleñ,

İştegi añsar tekke öler…

Qorıqsa eger aqındar neden,

Arular soğan tap keler!..

Jetti endi, öşir!

Jarıqtı da öşir!

Jüdedim,

Jazdım,

Qamıqtım,

Sağınğam,

Süygem,

Jalıqtım, keşir,

Bärinen, dosım, jalıqtım!

Jürektiñ qanın qotarıp iştim,

Köterip iştim köz jasın,

«Eñ wlı aqın» atanıp iştim,

Senbegenmenen öz basım!

İşpeymin endi!

Mäyhanalardan,

Alıp ket alıs joldarğa!

…Bir jarıq meken bayqala ma aldan,

Bir jarıq jürek bar ma alda?!

 

 

Köz jası

 

Kinämşil sezimder keşirtken kezimniñ

Bwltı auıp baradı basımnan:

Men biik twrudı üyrendim,

Özimniñ

Bir tamşı jasımnan.

Bala-añsar sağımı oynağan dalanıñ tösinde,

Kezinde köktemgi jañbırdıñ,

Alğaşqı köz jasım tamğanı esimde –

Bir tamşı uıtı tağdırdıñ.

O, sonda sezsemşi,

ötemin

qanşalıq azaptı boların töleudiñ:

Älemniñ özgerip keterin,

Özgerip keterin öleñniñ!

Bwl dünie tım basqa bolatın,

Jas ırşıp tüskenşe janardan,

Sol bir jas – qara tün,

aq nwrdan jaralğan,

Tırs etti…

Qara jer dir etti!..

Topıraq bolmısı özgerdi:

Özgertti ol gülderdi, qwstardı,

jürekti…

söz de endi

bilsemşi kelmesin qalpına bwrınğı,

Auıtqıp keterin ğasırdan!..

…Üyrendim men solay biikte twrudı

Közimniñ bir tamşı jasınan.

Sodan soñ…

Taular da jılağan,

Dala da jılağan,

Eşkim de bolmadı sebebin swrağan,

Sebebin bilmedi bir adam.

Olar da özgergen,

Özgergen öleñmen…

…Bir tamşı jas tamıp ketpeuin közderden,

küzetip kelem men,

o, sol bir twmandı jıldardan!

Keşsem de basqa mwñ,

Men endi joqtaman jıldardı wrlanğan,

Meni endi jılata körmeşi, Aspanım!..

 

***

Naurızdıñ biri me, erteñ?..

Twrğanı-ay bir sezimniñ alıp qaşıp.

Köşege şığayıqşı külip, erkem,

Köktemköz ğaşıqtarday qol wstasıp!

 

Bala gül köñilindey,

Aq jüziñde alqızıl ot almasıp,

Köktemniñ eñ alğaşqı şeruinde,

Qayıñdarmen jüreyik qatar basıp!

 

Moynıñda külgin şäli,

Jasıl köylek – jaña wran körikke şın.

Külkiñdi sanduğaş pen bwlbwl salıp,

Gülder näziktigiñe eliktesin.

 

Iıqqa qwstar qonıp,

Bwyıqqan dünie bizge eleñdesip,

Seni körgen adamdar qwştar bolıp:

«Aqınnıñ jarı, şirkin, öleñ!» desin.

 

Sen sonda äntek külip,

Köziñniñ jorta qara şalğayınan,

Men, bolsam, jürekterdi örtep twrıp,

Süyermin sol öleñniñ mañdayınan.

Köktemniñ biri me, erteñ,

Sekildi qıstıñ soñğı keşi kirgen?!

…Köresiñ, bir köktemdi tübinde, erkem,

Men seniñ atap ketem esimiñmen!

 

***

Esiñe aldıñ ba esimimdi auıq,

Sol bir jas jürek atınan?!

…Ömirimniñ keyde esigin jauıp,

Terezesinen qarap otıram.

 

Tereze aldında telmiredi oylar,

Şeşilmey qalğan kürmeui.

Keşegi kündi körmege qoyğam,

Köñildiñ tükpirindegi.

 

Ökpeni, nazdı, sağınış, mwñdı,

Qatırıp qoydım müsin qıp.

Keşegi parlaq alıp-wşudı,

Alısqa qaray wşırdıq.

 

Kitap işinde künder ötude,

Senesiñ be, olar – tiri şın!

Al seniñ ömiriñ kimmen ötude,

Kimder ötude küni üşin?!

 

Köp müsinderdiñ biriniñ, biraq

Bere almay qoydım pişinin.

Ol seniñ iñkär jüregiñ jılap,

Mwñdanıp twrğan müsiniñ!

 

Men üşin asqaq dastanda esimiñ,

Dastannan, bälkim, wlılau.

Ömirimniñ bir kün aşqanda esigin,

Sen külip twrşı, künim-au!..

 

 

Qaradım

 

Bir inju,

İñkərlik teñizi tübinde saqtalğan –

jüregiñ,

Şəkirttey, piriniñ aldında aqtalğan

jüregim.

Pəkzada gülderi bağında laladay

kelbetiñ,

Düniege eñ alğaş tañdanğan baladay

kelbetim.

Parasat aspanı jaratqan bir jwmbaq –

bolmısıñ,

Ğaşıqtar adasqan ımırtta twnjır baq

bolmısım.

Gauharday - swlulıq perisi qolında –

sausağıñ,

Iilgen səmbi tal sekildi jolıñda

sausağım.

Sağınış tünderin nwrlı etken ay sındı

eriniñ,

Sol jaylı şeksiz bir oy sındı

erinim.

Məñgilik siqırdıñ tarqamas duası –

janarıñ,

Sen süygen əlemniñ eñ ülken künəsi –

janarım...

 

 

Keyde oylaymın...

 

Keyde oylaymın,

Şınımen men ömirde bar şığarmın,

Japıraq,

Topıraq pa,

tamşılardıñ,

Bälkim, biri şığarmın, jo-joq, älde,

Jay ğana kitaptağı jan şığarmın.

Jabıqqan, jan şığarmın, jañılısqan,

Ümitten,

armandardan,

sağınıştan,

Twratın öne boyı ömirqwmar,

Mwratın är ğasırğa alıp wşqan.

Qwday-au, bir şeksizdik oy degeniñ,

Jürgenim, qarağanım, söylegenim,

Şınğa wqsap ketedi, senip qalıp,

Ğaşıq bolğım keledi keyde meniñ.

Joq, älde qws pa ekenmin, gül me ekenmin,

Özime bir tanıspın, bir bötenmin.

Arudıñ tüsindegi beyne me ekem,

Jarımnıñ işindegi mwñ ba ekenmin.

Men osı bar şığarmın bwl ömirde,

Sonau bir tükpirinde, tüneginde,

Arudıñ mölt ettim be janarında,

Jarımnıñ lüp ettim be jüreginde?

Qoğamnıñ bar şığarmın esebinde,

Kezeginde... ne jıl, neşe künge...

Ömir sürgim keledi keyde meniñ,

Şınımen bar şığarmın osı ömirde?!.

Mwñlıqtar,

äulielerdiñ,

jolşılardıñ,

Armanın appaq-appaq arşıp alğım,

Keledi,

ey, adamdar,

aytşı mağan,

Men osı bwl ömirde bar şığarmın?!

Bilmeymin, qaydan kelgem, qayda bolğam,

Saldım ba künge saray, ayğa qorğan?!

...Mümkin, aqın şığarmın, kim biledi,

Dünie kürsingende payda bolğan!?.

 

 

«Gülända» kitap dükeninde

 

Almatı.

Qırküyek.

Keş.

Kitap dükeni.

«Qojayın, sağatqa qarama!»

Tüsinem, onı üyi kütedi...

Al meniñ şıqqım joq dalağa.

Qalada köñildiñ bop jatır qay toyı,

Gülderdiñ iisi joq qalalıq!...

Ol jaqta daurıqqan bilgişter ayqayı,

Bwl jerde momaqan danalıq.

Täkkappar danalıq

Kitaptıñ işinde

Jalıqqan özinen.

Men de erteñ däl osı kitabi pişinde

Osında kelemin...

Sezinem.

Qojayın,

Bäribir kelem ğoy,

Tüsin sen,

O, sonda qızdarğa qımbatqa satasıñ.

Bügingi jaqsılığıñ üşin Sen

Alasıñ apamnıñ batasın!

Kitaptar söresi – swludıñ belindey

Mayısqaq,

Auır ğoy şaldardıñ salmağı...

Qoldarım – ibalı kelindey

Wsınğan keseni batırmay barmağın,

Möp-möldir añsar men ıntanı wsına

Sipaymın kitaptı:

är sözdiñ demi

men

sezinem lüpilin,

jürektiñ wşına

şımırlap twnuın däuirdiñ erigen.

Balqidı däuirler oylarda ıp-ıstıq

İşinde jalğızdıñ twrğan top şetinde!

Danalıq –

Ünsizdik, tınıştıq,

Şıñğırar tek kitap betinde!

Mwnda da şaldar köp pıstırğan jatıp iş

Menimen oynaydı:

«Osınşa aqımaq, osınşa naqwrıs –

Bwl bala bizderge qosılmay qoymaydı!»

O, sosın qaraydı kemseñmen

wğarday

täkkappar oylardan.

Eşkimdi üñgirden suırıp şığa almay

özderi üñgirge aynalğan,

Şaldar-ay, süyemin senderdi

Sezimmen eşkimdi süymegen.

Senderden üyrense-au ölmeudi,

öludi özim-aq üyrenem!

Qwrdastar köp emes, -

Kökem oy, şeşe mwñ,

Bärinde täñirdiñ demi bar!

Mende äli tiri jür

Mağjan men Esenin,

Meni äli bilmeydi

Borhes pen Elyuar!

Al, Hafez –

Nağaşım jırınday,

Tonauğa dayınmın qaramay.

Moulävi –

Qwpiyalı swluday,

Dımıñdı qwrtadı qaraday.

Asaular,

bwlğaqtar

keşegi

momaqan kitapqa qalayşa sıyıp twr?

Esedi samal jır, añızdar köşedi –

öşedi –

öşkeni –

ömirden biik twr!

Almatı.

Qırküyek.

Keş.

Kitap dükeni.

Sırtınan jabamın esigin.

Esiktiñ sırtında jalğızdıq kütedi,

Men onıñ jalğız dosımın!..

 

 

Sen bilesiñ...

 

Sen bärin de bilesiñ, bärin-bärin,

Dauıldarın jürektiñ, jauındarın.

Qay köktemde qwstardıñ keşikkenin,

Sonda meniñ janımnıñ auırğanın.

Qay bir sözdiñ dertimdi emdegenin,

Qay bir äuen beyuaq terbegenin,

Qay bir küzde gülderdiñ erte solıp,

Ertesine men sağan kelmegenim.

Sen bilesiñ sezimniñ jazdağı änin,

Jazmış otı jürekte mazdağanın,

Küyin keşip bir sätte bozbalanıñ,

Bir sätte janıp kete jazdağanım.

Sen bilesiñ tağdırdıñ şayqağanın,

(Şayqalamın taularday, jay tabamın),

Qay nöserdiñ astında kökke qarap,

Qanday sözdi işimnen qaytaladım,

Sen bilesiñ,

Janım ne qalaytının,

Sağan mälim – tabarım qalay tınım,

Qay dwğanı tañerteñ oqitınım,

Qay kitaptı keşkilik qaraytınım,

Sen bilesiñ, erke qız, bärin-bärin,

Senen özge jürekke şağınbadım,

Qay tünderde qanday tüs körgenimdi,

Sol tüsterdiñ qalayşa jorılğanın,

Sen bilesiñ,

jan bilmes sırlarımdı,

özim şeşe almaytın jwmbağımdı,

Eşbir adam körmegen belgilerdi,

Eş jinaqqa enbegen jırlarımdı,

Sen bilesiñ,

bäriniñ bir deregin,

Sen bilesiñ nelikten mwñlı öleñim,

...Meniñ kinäm şığar-au,

Bärin bilip –

Mağan kerektigiñdi bilmegeniñ...

 

 

Wzatılmağan qız

 

Wzatpadı onı. Wzamadı üyden.

Üyi de äri qaşıqtau.

...Bir jigit boldı-au, sirä da süygen,

Sol jigit boldı-au jasıqtau...

Qaray da qaray ayna da eskirdi,

Jek kördi, mümkin, aynanı,

Aylı tünderde ol oyladı eşkimdi,

Eşkim de onı oyladı...

Jılay da jılay jastıq sarğaydı,

Jastıq ta dwşpan - är taysa.

...Jigit pen qızda dostıq bolmaydı,

Boladı, bälkim, qartaysa...

Taray da taray taraq ketildi,

Ketilgen şığar tözimi,

...Wzaq saqtalğan şarap sekildi,

Wzatılmağan qızdıñ sezimi.

 

 

Ol qaytıp keldi...

 

Beymezgil şaqta ol qaytıp keldi,

Tağdırdan, älde, jañbırdan...

Janınıñ mwñın jolğa aytıp keldi,

Jol qaytıp keldi abdırğan.

«Qaytqan oylardıñ kemel me bäri,

Wşarda onı ne qaqtı?!» -

Täkappar taular tömen qaradı,

Taza bwlaqtar keri aqtı.

Qws qaytıp keldi:

Ombı qarlarğa,

Köşken señderge «qoş» desip.

...Anau bir törde dombıra qaldı,

Anau bir jerde bos besik...

Jabuı jüktiñ jelpildep keldi,

Seldirep keldi jelegi,

Botaday közi möltildep keldi –

Bozdamasa eken degeni...

Mahabbat äni – mwñdarda qalar,

Mahabbat – mwndar, şermende!

Qaueset izi qwmdarda qalar,

Köz jası izi – kölderde.

Öteui jürek – ökpeli bolsa,

Jasasın wlı qwştarlıq!

...Köşken bir jwrtta köktemi qalsa,

Qaytarmañdarşı qwstardı!

 

 

Sağan, sağan

 

Sağan, sağan tañnan bwrın jetemin,

Tauda bolsın, qırda bolsın mekeniñ.

Terezeñdi ayqara aşıp,

Jastıqqa

Bir tal taudıñ gülin qoyıp ketemin.

Sağan, sağan tünnen bwrın baramın,

Sansız şamı söngeninşe qalanıñ.

Qımtay jauıp aq körpeñdi,

Jastıqqa

Bir tal gülin qoyıp ketem dalanıñ.

Sağan, sağan bwrın jetem özimnen,

Bwrın jetem sağınıştan, tözimnen.

Esimimdi esti almay auzıñnan,

Kelbetimdi körmesem de köziñnen.

Sağan, sağan bwrın jetem mwñdardan,

Bwrın jetem bwl qatıgez jıldardan.

Sätsizdikten, tağdırıñnan, sınğannan,

Jalğızsırap, jılamsırap twrğannan.

Bwrın jetem ümitten de, armannan,

Kereksiz bop, laqtırılıp qalğannan.

Qartayudan, jas ömiriñ solğannan,

Seni wğa almas jay kezdeysoq jandardan.

Bwrın jetem köz jasıñnan tögilgen,

Sätteriñnen şegingen de jeñilgen.

Künnen, tünnen, mwñnan, jastan qorğauşı

Perişteñe aynalamın seniñ men.

Qatal uaqıt qayrañdatsın, tejesin,

Qatal adam qara qolın kezesin.

Tım alısta jürgenimdi bilgenmen,

Tım jaqında twrğanımdı sezesiñ.

Körgen tüste kezdessek biz, öñ dep bil,

Tar kezeñde jolıqsaq biz, keñ dep bil.

Qara aspanda bir aq säule jalt etse,

Sağan, sağan bwrın jetken men dep bil.

 

 

Kezdesu

 

Ne istey alar ekenmin sen üşin men?

Baldıñ, udıñ... qwday-au, köbi işilgen.

Qaraymın da jüziñe, oylanamın,

Äldeneni aytamın... tek işimnen.

İşi-bauırım ezile, emirene,

Emirene qaraymın, tebirene.

Sağan ğana aytatın sırlarım bar,

Sağan endi aytpaymın sonı nege?

Öñim tağı qwbılıp ört keşkendey,

Köñil tağı qwbılıp dert köşkendey,

Saqtau üşin bir wlı qwpiyanı,

Ündemeuge ekeumiz sertteskendey,

Ündemeymiz. Ünsizdik wnağanday,

Ündemeymiz, işte bir kinä barday.

Mañdayıñnıñ qaraymın sızığına,

Hal-jayıñdı solardan swrağanday.

Janımızdı, jürekti twmşalasıp,

Qayda jürdik jolıqpay mwnşa ğasır?!

Mağan qarap kürsinip qoyasıñ tek,

Bilem, bilem, işiñnen mwñ şağasıñ,

Mwñ şağasıñ, sezemin, mwñayasıñ,

Mwñayğanıñ ädemi, qwdaya, şın.

Men seni ayap otırmın, sen meni ayap,

Ayarlıqsız osılay kim ayasın.

Kisi köñili köktemge senedi eken,

Sol senimder bop edi nege böten?

Bizdi ayırğan bir kezgi jegi sözder,

Ünsizdikte osılay öledi eken.

Ündemeşi. Osılay naz aytılar.

Qaybir swraq köñildi qajay twrar.

Ündemeymin. İşte söz janıp-sönip,

Bizge bügin keregi özi aytılar.

Ötken ömir – wmtılğan tüstey ğana,

Endi bizge eşkim de tüspeydi ara.

...Ötip keter me ekenbiz bwl ömirden,

Kübirlesip ekeumiz iştey ğana…

 

 

Jazmış

 

Jazam dedim, qalam berdi Täñirim,

Aşam dedim, ğalam berdi Täñirim,

Qara öleñdi mağan berdi Täñirim,

Bar älemdi sağan berdi Täñirim!

Qara gülge öleñ jazdım, aq boldı,

Qara mwñğa öleñ jazdım, baq boldı,

Qara tünge öleñ jazdım, nwr boldı,

Qara tasqa öleñ jazdım, taq boldı!

Bwl dünieniñ bas-basına jazdım men,

Tağdırımnıñ taspasına jazdım men,

Tañğajayıp düniesinde täñirdiñ,

Mañdayıñnan basqasına jazdım men!

 

 

Şığıs dwğası

 

Ey, mwsılman jelder,

Sender,

Bir habarın beriñder onıñ,

Ey, mwsılman kölder,

Körkem jüzin köriñder onıñ,

Momın özender,

Su betindegi beynesin saqtap,

Momın kezeñder,

Jan düniesindegi appaq,

Mahabbatın qorıp,

Mahabbatın qorıp,

Mahabbatın qorıp,

Ey, älemdik Jürek,

Ey, qasterli Jarıq,

Ey, kieli Tünek,

Ey, ğasırlıq Mwñdar,

Ey, İñkärlik äppaq,

Ey, mwsılman Şıñdar,

Ey, mwsılman Soqpaq,

Jetkiziñder Mağan!

Jetkiziñder bügin,

Öpkiziñder mağan,

Mañdayınıñ nwrın!

 

 

Türki dwğası

 

Men – parasatsız,

Bwl älemde mahabbat barına sendim,

Adamdardıñ arına sendim,

Äulielerdiñ jolına sendim,

Qalalardıñ janına sendim,

Tañ dwğasın Şığıstan sozdım,

Tün dwğasın Batıstan sozdım,

Kiesin korğağım keldi Sözdiñ,

Nwrın saqtağım keldi Közdiñ,

Oñtüstikten oy şwğılasın şaştım,

Soltüstikten sezim şwğılasın şaştım,

Qwrlıqtardı aştım,

Teñizderdi bastım,

Jaratuşınıñ bergen Jırımen,

Tabiğattıñ bergen Sırımen,

Qara tastı da şayır qılğım keldi,

Kara ağaştı da biim qılğım keldi,

Aş jürekterdi toyındırğım keldi,

Jalañaştarın kiindirgim keldi,

Bäriniñ qasınan tabıldım,

Bärine qwrban şaldım,

Qara jerdi jastandım,

Kök aspandı jamıldım,

Öz jüregim jalañaş,

Öz jüregim aş qaldı,

Özim... jalğız qaldım!

...Eñ ğajabı, bwl mağan wnaydı!

 

 

Batıs dwğası

 

Bwrın, bwrın bir sözdi biluşi edim,

İştey ğana qaytalap jüruşi edim,

Keyin sonı wmıttım... nege wmıttım,

Ne bilip kep, ömirden ne bilippin?!

Qalıñ-qalıñ tomdardan taba almadım,

Qiır-qiır joldardan taba almadım,

Taba almadım mwrajay, mwrağattan,

Dalalardan, özennen qwlap aqqan,

Mezgilderden, mausımdar jañbırınan,

Aqşamdağı şwğıla, tañ nwrınan,

Dwğasınan moldanıñ, şamannıñ da,

Taba almadım, bilmeymin, taba aldım ba,

Äyteuir men, jürektiñ bar armanın,

İzdegenin, tapqanın, joğalğanın,

Sol bir sözben aytsam dep sağan, janım,

Közderiñnen közimdi ala almadım!

"The Qazaq Times"