7 qañtarda Özbekstan wlttıq qauipsizdik komiteti tergeu basqarmasınıñ bwrınğı basşısı, polkovnik Nodir Turakulovtıñ bıltır 25 qazanda 16 jılğa bas bostandığınan ayırılğanı belgili boldı.

"Ezgulik" qwqıq qorğau qoğamınıñ basşısı Abdurahmon Taşanov Nodir Turakulov isindegi jäbirlenuşilermen söyleskenin aytadı.

"Polkovnik Turakulov Nodirğa bıltır 25 qazanda Joğarı äskeri sotta ükim şıqqan eken. Ol Qılmıstıq kodekstiñ on babı - "para alu", "bopsalau", "qızmetin asıra paydalanu", "alayaqtıq" t.b. baptar boyınşa ayıptı dep tanılıp, 16 jılğa sottalıptı", - deydi Abdurahman Taşanov.

42 jastağı Nodir Turakulovpen birge 12 adam sottalğan. Olardıñ işinde arnayı qızmettiñ, prokuraturanıñ, miliciyanıñ ökilderi men käsipkerler bar.

Qwqıq qorğauşı Taşanovtıñ aytuınşa, qazir Turakulovqa qatıstı ekinşi bir qılmıstıq is qozğalğan.

Arnayı qızmettiñ bwrınğı polkovnigi Nodir Turakulov bıltır 22 qañtarda Taşkentte wstalğan. Osıdan keyin 23 jıl boyı Wlttıq qauipsizdik qızmetin tapjılmay basqarıp kelgen Rustam Inoyatov qızmetinen alındı. Onıñ ornına bas prokuror bolğan Ihtier Abdullaev tağayındalğan.

"The Qazaq Times"