2018 jılğı eleuli oqiğalarğa şolu. Foto: Pinterest.

2018 jıl el işi-sırtındağı kürdeli sayasi, äleumettik özgeristerge tolı boldı. Twtas adamzattı alañdatqan Klimat özgeristeri men jaratılıstıq apattar da, adamzat qoğamınıñ bolaşağına ümit bağıştağan ğılım-tehnikanıñ tıñ jetistikteri de biılğı jılmen birge tarih paraqtarına jazılıp qaldı. «The Qazaq Times» portalında älemdegi jäne el işindegi eleuli oqiğalardı, sayasi özgeristerdi, ğılım jañalıqtarın barınşa qalt jibermeuge tırıstıq. Uaqıttıñ ozuımen 2018 jıldı artqa qaldırıp, alda adamzat tarihınıñ tağı bir jılın bastağalı otırmız. Osığan oray ötken bir jıldağı saytımızda köterilgen eleuli mäselelerge şolu jasay ketudi jön körip otırmız.

It jılı, esteriñizde bolsa, Irandağı äleumettik tolqular men Soltüstik Koreya rejiminiñ beybitşilik procesine qaray betbwrıs jasauımen este qaldı. Bwğan deyin Korey tübegindegi jağday yadrolıq soğıs qaupin küşeytip twrğan edi. Al, Irandağı äleumettik tolqu öñirdegi özge elderge de oy salıp, sabaq bergendey boldı.

Qañtardıñ orta şeninde QR prezidenti AQŞ-qa resmi saparmen barıp, Aq üy basşısı Donal'd Tramppen kezdesu ötkizgen bolatın. Bwl Qazaqstan ğana emes, Ortalıq Aziya üşin de mañızdı oqiğalar bolıp qaldı. 5+1 jobası AQŞ pen Orta Aziyanıñ jaña jobaların damıtadı dep kütildi.

Saytımızda AQŞ-Qıtay sauda qaqtığısı bastaludan 4 ay bwrın eki el qarım-qatınasınıñ bwzılatının, sonday-aq, sauda jäne strategiyalıq qarsılas küyine ötetinin boljağan edik.

Sonday-aq, sauda soğısınıñ saldarı men jeñimpazı turalı da öz oylarımız ben älem aqparat qwraldarınıñ pikirlerin salıstıra qarastırğan bolatınbız.

Jer şarı klimatınıñ özgerisi men ğalamdıq jılınudıñ, jaratılıstıq apattardıñ jiileuine baylanıstı bolaşaqta adamzat tap boluı mümkin 10 ülken qorqınıştı taldanğan.

Oñtüstik jäne Soltüstik Koreya basşılarınıñ alğaşqı kezdesui Korey tübeginiñ tarihi betbwrıs oqiğası bolıp tarihta qaldı.

Osıdan keyin köp wzamay, Singapurda Tramp-Kim tarihi kezdesui ötti.

AQŞ pen Qıtay Tınıq mwhitındağı köşbasşılıq orınğa talası jıldıñ eñ bastı sayasi, strategiyalıq taqırıbına aynaldı.

Biılğı jılı qazaq aqparat keñistiginde köbirek köterilgen taqırıptardıñ biri – Qıtaydağı qandastardıñ basına tüsken jağday boldı. Portalımız da Qıtaydağı quğın-sürgin jağdayın, tipti bwl ürdistiñ bastaluınan bwrın da alğaşqılardıñ biri bolıp üzdiksiz köterip keldi.

Qırküyek ayında birneşe jüz mıñ halıq sanı bar Süriyanıñ Idlib öñiri soğıs qaupinde twrdı.

Qıtay taqırıbı biılğı jıldağı eñ bastı taqırıptardıñ biri boldı. Beyjiñniñ sayasi betalısı älem nazarın audardı.

Taraptardıñ äskeri, sayasi qadamdarına qaray otırıp, AQŞ pen Qıtay arasında tayau on jıl işinde soğıs boluı mümkin ekeni boljanğan.

Bwdan tıs, sauda soğısı jağdayındağı Qıtaydıñ Europağa bet aluı, Qıtay-AQŞ arasındağı Tayuan mäselesi,  Auğanstandağı 17 jıldıq soğıstıñ büginşi nätijesi, sonday-aq, AQŞ sankciyasındağı Irannıñ jağdayı turalı saraptaular jasalğan edi.

Jeltoqsanda Argentinada ötken "Ülken jiırmalıq" sammitinde Tramp pen Şi Jinpiñ arasındağı kelissöz älem aqparat qwraldarınıñ nazarın özine audardı.

Bwl oqiğalar älemniñ sayasi bağıt-bağdarın anıqtauğa tolıq jetkilikti bolmasa da, biılğı jıldıñ kürdeli sayasi jağdayın bağamdap bermek.

“The Qazaq Times”