Qıtay BWW-dağı twraqtı ökili Ma Çauşüy. Foto: VOA.

Qıtaydıñ BWW-dağı twraqtı ökili Qauipsizdik keñeste adam qwqığı mäselesin talqılauğa qarsı ekenin bildirdi. Qıtaydıñ arnayı ökili Ma Çauşüy bwnday mälimdemeni, keşe, Qıtaydıñ qaraşa ayında BWW Qauipsizdik keñesindegi jwmıstarınıñ qorıtındısına arnalğan baspasöz jiınında ayttı.

Baspasöz mäjilisinde jurnalisterdiñ biri AQŞ-tıñ Soltüstik Koreyadağı adam qwqığı mäselesin Qauipsizdik keñeste talqılau turalı ötiniş jasap otırğanın, Qıtay tarabı bwğan qalay qaraytının swrağan. Ma Çauşüy öz jauabında, Qıtaydıñ wzaq uaqıttan beri wstanıp kele jatqan poziciyası atalmış keñeste adam qwqığınıñ talqılanuına qarsı twru ekenin bildirdi. Onıñ aytuınşa, Qıtay tarabı BWW-dağı wyımdar öziniñ ökilettigi bar jwmıstarğa säykes boluı, äri, wyımdardıñ arasında jwmıs bölisi ayqın boluı kerek dep qaraydı.

Associated Press aqparattıq agenttiginiñ habarında, AQŞ osı aptada BWW Qauipsizdik keñesinde Soltüstik Koreyadağı adam qwqığın qorğau mäselesin talqılau üşin keñes ötkizudi swrağan. Bwl öz kezeginde Soltüstik Koreyanıñ küşti qarsılığına wşıradı.

Soltüstik Koreyanıñ BWW-dağı ökili Kim Soñ Qauipsizdik keñestegi AQŞ-tan özge müşe elderge hat joldap, atalmış otırstı ötkizuge qarsı dauıs beruin swrağan. Ol hatında AQŞ jäne onıñ odaqtas elderi «barlıq ıqtimal täsilderdi qoldanıp, atalğan jinalıstı ötkizuge tırısıp otırğanın», bwl qadam Soltüstik Koreyanı «qarsılasuğa itermeleu»  äreketi dep ayıptağan.

Jalpı, Qauipsizdik keñes soñğı tört jıldan beri Soltüstik Koreyadağı adam qwqığı mäselesin talqıladı. BWW Adam qwqıqtarı jönindegi komissiya qaraşanıñ basında bir auızdan şeşim şığarıp, Soltüstik Koreyadağı «wzaq uaqıttan beri, äri jüyeli, bükil memlekettik deñgeyde adam qwqıqtarınıñ bwzılıp otırğanın» ayıptağan bolatın. Sonımen birge, KHDR biligin adam qwqıqtarın bwzu äreketterin tez arada toqtatuğa şaqırğan.

“The Qazaq Times”