قىتاي وكىلى: قىتاي تارابى قاۋىپسىزدىك كەڭەستە ادام قۇقىقى ماسەلەسىن تالقىلاۋعا قارسى

قىتايدىڭ بۇۇ-داعى تۇراقتى وكىلى قاۋىپسىزدىك كەڭەستە ادام قۇقىعى ماسەلەسىن تالقىلاۋعا قارسى ەكەنىن ءبىلدىردى. قىتايدىڭ ارنايى وكىلى ما ءچاۋشۇي بۇنداي مالىمدەمەنى، كەشە، قىتايدىڭ قاراشا ايىندا بۇۇ قاۋىپسىزدىك كەڭەسىندەگى جۇمىستارىنىڭ قورىتىندىسىنا ارنالعان ءباسپاسوز جيىنىندا ايتتى.

ءباسپاسوز ماجىلىسىندە جۋرناليستەردىڭ ءبىرى اقش-تىڭ سولتۇستىك كورەياداعى ادام قۇقىعى ماسەلەسىن قاۋىپسىزدىك كەڭەستە تالقىلاۋ تۋرالى ءوتىنىش جاساپ وتىرعانىن، قىتاي تارابى بۇعان قالاي قارايتىنىن سۇراعان. ما ءچاۋشۇي ءوز جاۋابىندا، قىتايدىڭ ۇزاق ۋاقىتتان بەرى ۇستانىپ كەلە جاتقان پوزيتسياسى اتالمىش كەڭەستە ادام قۇقىعىنىڭ تالقىلانۋىنا قارسى تۇرۋ ەكەنىن ءبىلدىردى. ونىڭ ايتۋىنشا، قىتاي تارابى بۇۇ-داعى ۇيىمدار ءوزىنىڭ وكىلەتتىگى بار جۇمىستارعا سايكەس بولۋى، ءارى، ۇيىمداردىڭ اراسىندا جۇمىس ءبولىسى ايقىن بولۋى كەرەك دەپ قارايدى.

Associated Press اقپاراتتىق اگەنتتىگىنىڭ حابارىندا، اقش وسى اپتادا بۇۇ قاۋىپسىزدىك كەڭەسىندە سولتۇستىك كورەياداعى ادام قۇقىعىن قورعاۋ ماسەلەسىن تالقىلاۋ ءۇشىن كەڭەس وتكىزۋدى سۇراعان. بۇل ءوز كەزەگىندە سولتۇستىك كورەيانىڭ كۇشتى قارسىلىعىنا ۇشىرادى.

سولتۇستىك كورەيانىڭ بۇۇ-داعى وكىلى كيم سوڭ قاۋىپسىزدىك كەڭەستەگى اقش-تان وزگە مۇشە ەلدەرگە حات جولداپ، اتالمىش وتىرستى وتكىزۋگە قارسى داۋىس بەرۋىن سۇراعان. ول حاتىندا اقش جانە ونىڭ وداقتاس ەلدەرى «بارلىق ىقتيمال تاسىلدەردى قولدانىپ، اتالعان جينالىستى وتكىزۋگە تىرىسىپ وتىرعانىن»، بۇل قادام سولتۇستىك كورەيانى «قارسىلاسۋعا يتەرمەلەۋ»  ارەكەتى دەپ ايىپتاعان.

جالپى، قاۋىپسىزدىك كەڭەس سوڭعى ءتورت جىلدان بەرى سولتۇستىك كورەياداعى ادام قۇقىعى ماسەلەسىن تالقىلادى. بۇۇ ادام قۇقىقتارى جونىندەگى كوميسسيا قاراشانىڭ باسىندا ءبىر اۋىزدان شەشىم شىعارىپ، سولتۇستىك كورەياداعى «ۇزاق ۋاقىتتان بەرى، ءارى جۇيەلى، بۇكىل مەملەكەتتىك دەڭگەيدە ادام قۇقىقتارىنىڭ بۇزىلىپ وتىرعانىن» ايىپتاعان بولاتىن. سونىمەن بىرگە، كحدر بيلىگىن ادام قۇقىقتارىن بۇزۋ ارەكەتتەرىن تەز ارادا توقتاتۋعا شاقىرعان.

“The Qazaq Times”