24 adam emhanağa jetkizildi. Foto: VOA.

Auğanstannıñ resmi twlğaları taratqan mälimette, Kabuldağı dini lauazımdılar jinalısında jankeşti jasağan jarılıstan keminde 50 adam qaza tauıp, 83 adam jaraqat alğan.

Auğanstan İşki ister ministriniñ mälimetine qarağanda, jankeşti denesine baylağan jarılğıştı jarıp jibergen. Jarılıs kezinde jergilikti dini lauazımdılar Mwhammed payğambar düniege kelgen «Mäulit künin» atap ötuge jinalğan. Eldiñ Densaulıq saqtau ministrligi tarabınan berilgen mälimette, 24 adamnıñ emhanağa jetkizilgeni aytıladı.

El prezidenti Aşraf Gani mälimdeme jasap, şabuıldı ayıptadı jäne särsenbi küni, yağni bügin Auğanstan köleminde atalğan şabuılda qaza tapqandarğa aza twtıp, Auğanstannıñ jäne sol elde twratın şeteldik ortalıqtardıñ, elşilikterdiñ tuı jartılay tüsiriletinin ayttı.

Kuägerlerdiñ aytuınşa, jarılıs bolğan orında 1000-ğa juıq adam jäne eldegi bedeldi dini lauazımdılar bolğan.

Taliban tarabı mälimdeme jasap, dini bas qosudağı jarılıstı ayıptadı jäne şabuıldıñ Taliban tarabınan jasalmağanın jetkizdi. Keybir aqparat közderi, jarılıstı jasağandar «Islam memleketi» terrorlıq wyımınıñ Auğanstandağı küşteri boluı mümkin dep sanaydı. Taliban wyımnıñ jarılıstı ayıptauı «DAIŞ» küşterine degen kümändi arttıradı.

Auğanstandağı halıqaralıq wyımdar men AQŞ elşiligin qamtığan şetel elşilikteri jarılıstı ayıptap mälimdeme taratqan. Olar şabuıldıñ Mwhammed payğambardıñ tuğan künine oray ötkizilgen dini mereke kezinde jasaluın qatañ sınğa alğan.

“The Qazaq Times”