اۋعانستاندا ءماۋلىت كۇنىن اتاپ ءوتۋ كەزىندە جارىلىس بولدى

اۋعانستاننىڭ رەسمي تۇلعالارى تاراتقان مالىمەتتە، كابۋلداعى ءدىني لاۋازىمدىلار جينالىسىندا جانكەشتى جاساعان جارىلىستان كەمىندە 50 ادام قازا تاۋىپ، 83 ادام جاراقات العان.

اۋعانستان ىشكى ىستەر ءمينيسترىنىڭ مالىمەتىنە قاراعاندا، جانكەشتى دەنەسىنە بايلاعان جارىلعىشتى جارىپ جىبەرگەن. جارىلىس كەزىندە جەرگىلىكتى ءدىني لاۋازىمدىلار مۇحاممەد پايعامبار دۇنيەگە كەلگەن «ءماۋلىت كۇنىن» اتاپ وتۋگە جينالعان. ەلدىڭ دەنساۋلىق ساقتاۋ مينيسترلىگى تارابىنان بەرىلگەن مالىمەتتە، 24 ادامنىڭ ەمحاناعا جەتكىزىلگەنى ايتىلادى.

ەل پرەزيدەنتى اشراف گاني مالىمدەمە جاساپ، شابۋىلدى ايىپتادى جانە سارسەنبى كۇنى، ياعني بۇگىن اۋعانستان كولەمىندە اتالعان شابۋىلدا قازا تاپقاندارعا ازا تۇتىپ، اۋعانستاننىڭ جانە سول ەلدە تۇراتىن شەتەلدىك ورتالىقتاردىڭ، ەلشىلىكتەردىڭ تۋى جارتىلاي تۇسىرىلەتىنىن ايتتى.

كۋاگەرلەردىڭ ايتۋىنشا، جارىلىس بولعان ورىندا 1000-عا جۋىق ادام جانە ەلدەگى بەدەلدى ءدىني لاۋازىمدىلار بولعان.

تاليبان تارابى مالىمدەمە جاساپ، ءدىني باس قوسۋداعى جارىلىستى ايىپتادى جانە شابۋىلدىڭ تاليبان تارابىنان جاسالماعانىن جەتكىزدى. كەيبىر اقپارات كوزدەرى، جارىلىستى جاساعاندار «يسلام مەملەكەتى» تەررورلىق ۇيىمىنىڭ اۋعانستانداعى كۇشتەرى بولۋى مۇمكىن دەپ سانايدى. تاليبان ۇيىمنىڭ جارىلىستى ايىپتاۋى «دايش» كۇشتەرىنە دەگەن كۇماندى ارتتىرادى.

اۋعانستانداعى حالىقارالىق ۇيىمدار مەن اقش ەلشىلىگىن قامتىعان شەتەل ەلشىلىكتەرى جارىلىستى ايىپتاپ مالىمدەمە تاراتقان. ولار شابۋىلدىڭ مۇحاممەد پايعامباردىڭ تۋعان كۇنىنە وراي وتكىزىلگەن ءدىني مەرەكە كەزىندە جاسالۋىن قاتاڭ سىنعا العان.

“The Qazaq Times”