Foto: akorda.kz

Keşe prezident N.Nazarbaev  jwrtşılıq jäne ziyalı qauım ökilderimen, sayasi qayratkerlermen kezdesti. Kezdesuge M.Joldasbekov, K.Sağadiev, R.Şırdabaev, O.Äbdikärimov, B.İzmwhambetov, M.Qasımbekov qatıstı. Bwl turalı Aqordanıñ resmi saytı jazadı.

Basqosu barısında konstituciyalıq reformalardı talqılaumen, sonday-aq auıl şaruaşılığı, mal şaruaşılığı, densaulıq saqtau, ğılım jäne bilim, şağın jäne orta biznes salaların jañğırtumen, jürgizilip jatqan jekeşelendirumen baylanıstı halıq üşin mañızdı ekonomikalıq, äleumettik, qoğamdıq auqımdı mäseleler talqılandı.

Memleket basşısı täuelsizdiktiñ 25 jılında Qazaqstan kürdeli jol jürip ötkenin atap ötip, respublikamızdıñ odan äri damuınıñ negizgi bağıttarına qatıstı öz oyın ortağa saldı.

– Qazaqstan tanımal elge aynaldı, ekonomikamız qarqındı damıp keledi. Endi «Qazaqstannıñ üşinşi jañğıruı: jahandıq bäsekege qabilettilik» attı joldauda belgilengen maqsattar men mindetterdi iske asıru üşin qol jetken jetistikterimizdi paydalana bilu qajet, – dedi Qazaqstan Prezidenti.

Nwrswltan Nazarbaev qazaqstandıqtardıñ aldında twrğan zamanaui sın-qaterlerge nazar audardı.

– Narıqtıq qatınastar jolın tañdağan qoğamımızdıñ aldında orındalu tiimdiligi eldiñ odan äri damuına ıqpal etetin tübegeyli jaña mindetter twr. Jahandıq ekonomika däuirinde innovaciya kün tärtibindegi bastı mäselege aynaldı. Industriyalıq töñkeris bizdi aynalıp ötpeuge tiis. Biz ekonomikamızğa innovaciyalıq tehnologiyalardı engize biluimiz qajet, – dedi Memleket basşısı.

Foto: akorda.kz

Sonday-aq, Qazaqstan Prezidenti bwl maqsattıñ jüzege asırıluı tiisti qarjı jwmsaudı qajet etetinin atap ötti.

– Eger innovaciyalıq tehnologiyalar äzirleuge qarajat bölmesek, onda bizge älemdik jaña ekonomikalıq qwrılımnıñ auqımınan tıs qalu qaupi tönui mümkin. Jappay öndiristi damıtu üşin jañaşıldıqtar engizu arqılı eñbek önimdiligin arttırğan jön. Bwğan käsiporındardıñ, sonday-aq eldiñ jetekşi joğarı oqu orındarınıñ janınan ğılımi-zertteu instituttarı qwrılıp, olarğa tiisti qoldau jasalğanda ğana qol jetkizu mümkin boladı. Mäselen, mwnday ğılımi-zertteu instituttarın «Alatau» innovaciyalıq tehnologiyalar parkiniñ, Nazarbaev Universitetiniñ janınan qwruğa mümkindik bar, – dedi Elbası.

Kezdesuge qatısuşılar Memleket basşısı bastamaşı bolğan, memlekettik bilik tarmaqtarı arasında ökilettikterdi qayta böluge bağıttalğan reformalardı tolıq qoldaytındarın bildirdi. Bwl rette eñ aldımen Parlamenttiñ jäne Ükimettiñ ökilettigin keñeytuge, onıñ derbestigi men jauapkerşiligin küşeytuge bağıttalğan qadamdardıñ der kezinde jasalğanı, progressivtiligi atap ötildi.

Bwğan qosa, kezdesuge qatısuşılar respublikalıq jäne jergilikti byudjet qarajatınıñ jwmsaluına qoğamdıq baqılau jasauğa, salalıq bağdarlamalardıñ orındaluına, jer reformasına, sıbaylas jemqorlıqqa qarsı sananı ornıqtırıp, «müldem tözbeuşilik» sayasatın tiimdi jüzege asıruğa, sonday-aq Bes institucionaldıq reformanı iske asıru boyınşa Wlt josparında belgilengen mindetterdi kezeñ-kezeñmen orındauğa qatıstı tüytkildi mäselelerge toqtaldı.

“The Qazaq Times”