Zeynetaqı qorındağı aqşa baspana nemese özge de qajettilikterge berile me?

Täuelsiz Qazaqstannıñ 27 jıldıq tarihında Birıñğay jinaqtauşı zeynetaqı qorı san märte reformalanıp, san märte jemqorlıq dauına ilikti. Biraq bügin biz «BJZQ eks-başılarınıñ işkenderi men jegenderi» degen ädebi körkem şığarma jöninde emes, «BJZQ-ğa jinalğan qarjını aluğa bola ma, joq pa?» degen swraqqa jauap izdep körmekpiz.

Keşe Birıñğay jinaqtauşı zeynetaqı qorınıñ basqarama törayımı Nwrbibi Naurızbayeva Astana qalasında ötken bas qosuda: «Qazaqstanda zañ boyınşa zeynetaqı qorındağı aqşanı baspana aluğa nemese basqa da qajettilikterge beru mümkindigi qarastırılmağan» - dep mälimdedi. Ol öz sözine dälel retinde Qazaqstan Birıñğay jinaqtauşı zeynetaqı qorınıñ qwrılğanına ne bäri 20 jıl ğana bolğandığın, onda jinalğan qırjınıñ asa köp emes ekendigin ayttı.

Qazaqstandıqtar özderi jinağan qarjısın özderi ala almasa da, onıñ qızığın şeteldik jäne otandıq bankter körip jatır.

Mamır ayınıñ 4-i küni parlament otırısında Wlttıq Bank törağası Daniyar Aqışev: «Birıñğay jinaqtauşı zeynetaqı qorınan bankterge investiciya salatın bağdarlama qayta jañğırdı. Osı maqsatta BJZQ-dan 200 milliard teñge qarjı alınadı» - dep mälimdegen. Al bwğan deyin BAQ betterinde BJZQ-nıñ 71,3 milliard teñge qarjısı Äzirbayjannıñ bankrotqa wşırağan bankine salınğandığı jöninde aqparat tarağan. Keyinnen sol kezdegi qarjı ministri (qazirgi Astana qalasınıñ äkimi) Baqıt Swltanov bastağan bir toğız Äzirbayjan bankine salınğan qarjı qaytarılatın boladı dep, «jelge wşqan 71 milliard teñge» mäselesin jılı jauıp qoyğan.

Jalpı, taban et, mañday teriñmen tapqan qarjıñdı ala almaytın tañ ğajayıp sıyqırlı Qazaqstannıñ Birıñğay jinaqtauşı zeynetaqı qorı jöninde köp dünie aytuğa boladı. Bwl sır men sıyqırğa tolı äñgimeniñ basım köpşiligi jahandanu däuirindegi Qazaqstannıñ ajıramas böligine aynalğan jemqorlıq jöninde bolatının işiñiz sezip te otırğan şığar. Biraq biz bügin «BJZQ eks-başılarınıñ işkenderi men jegenderi» degen ädebi körkem şığarma jöninde aytpaymız dep ayttıq basında. Dese de, BJZQ-nıñ bwrınğı basşısı Ruslan Erdenovtı 18 säuir küni Almatı sotı «qor qarjısın talan-tarajğa saldı jäne para aldı» dep ayıptap, 12 jılğa bas bostandığınan ayırğandığın ayta keteyik.

"The Qazaq Times"