زەينەتاقى قورىنداعى اقشا باسپانا نەمەسە وزگە دە قاجەتتىلىكتەرگە بەرىلە مە؟

تاۋەلسىز قازاقستاننىڭ 27 جىلدىق تاريحىندا بىرىڭعاي جيناقتاۋشى زەينەتاقى قورى سان مارتە رەفورمالانىپ، سان مارتە جەمقورلىق داۋىنا ىلىكتى. بىراق بۇگىن ءبىز «بجزق ەكس-باشىلارىنىڭ ىشكەندەرى مەن جەگەندەرى» دەگەن ادەبي كوركەم شىعارما جونىندە ەمەس، «بجزق-عا جينالعان قارجىنى الۋعا بولا ما، جوق پا؟» دەگەن سۇراققا جاۋاپ ىزدەپ كورمەكپىز.

كەشە بىرىڭعاي جيناقتاۋشى زەينەتاقى قورىنىڭ باسقاراما ءتورايىمى ءنۇربيبى ناۋرىزبايەۆا استانا قالاسىندا وتكەن باس قوسۋدا: «قازاقستاندا زاڭ بويىنشا زەينەتاقى قورىنداعى اقشانى باسپانا الۋعا نەمەسە باسقا دا قاجەتتىلىكتەرگە بەرۋ مۇمكىندىگى قاراستىرىلماعان» - دەپ مالىمدەدى. ول ءوز سوزىنە دالەل رەتىندە قازاقستان بىرىڭعاي جيناقتاۋشى زەينەتاقى قورىنىڭ قۇرىلعانىنا نە ءبارى 20 جىل عانا بولعاندىعىن، وندا جينالعان قىرجىنىڭ اسا كوپ ەمەس ەكەندىگىن ايتتى.

قازاقستاندىقتار وزدەرى جيناعان قارجىسىن وزدەرى الا الماسا دا، ونىڭ قىزىعىن شەتەلدىك جانە وتاندىق بانكتەر كورىپ جاتىر.

مامىر ايىنىڭ 4-ءى كۇنى پارلامەنت وتىرىسىندا ۇلتتىق بانك توراعاسى دانيار اقىشەۆ: «بىرىڭعاي جيناقتاۋشى زەينەتاقى قورىنان بانكتەرگە ينۆەستيتسيا سالاتىن باعدارلاما قايتا جاڭعىردى. وسى ماقساتتا بجزق-دان 200 ميلليارد تەڭگە قارجى الىنادى» - دەپ مالىمدەگەن. ال بۇعان دەيىن باق بەتتەرىندە بجزق-نىڭ 71,3 ميلليارد تەڭگە قارجىسى ءازىربايجاننىڭ بانكروتقا ۇشىراعان بانكىنە سالىنعاندىعى جونىندە اقپارات تاراعان. كەيىننەن سول كەزدەگى قارجى ءمينيسترى (قازىرگى استانا قالاسىنىڭ اكىمى) باقىت سۇلتانوۆ باستاعان ءبىر توعىز ءازىربايجان بانكىنە سالىنعان قارجى قايتارىلاتىن بولادى دەپ، «جەلگە ۇشقان 71 ميلليارد تەڭگە» ماسەلەسىن جىلى جاۋىپ قويعان.

جالپى، تابان ەت، ماڭداي تەرىڭمەن تاپقان قارجىڭدى الا المايتىن تاڭ عاجايىپ سىيقىرلى قازاقستاننىڭ بىرىڭعاي جيناقتاۋشى زەينەتاقى قورى جونىندە كوپ دۇنيە ايتۋعا بولادى. بۇل سىر مەن سىيقىرعا تولى اڭگىمەنىڭ باسىم كوپشىلىگى جاھاندانۋ داۋىرىندەگى قازاقستاننىڭ اجىراماس بولىگىنە اينالعان جەمقورلىق جونىندە بولاتىنىن ءىشىڭىز سەزىپ تە وتىرعان شىعار. بىراق ءبىز بۇگىن «بجزق ەكس-باشىلارىنىڭ ىشكەندەرى مەن جەگەندەرى» دەگەن ادەبي كوركەم شىعارما جونىندە ايتپايمىز دەپ ايتتىق باسىندا. دەسە دە، بجزق-نىڭ بۇرىنعى باسشىسى رۋسلان ەردەنوۆتى 18 ءساۋىر كۇنى الماتى سوتى «قور قارجىسىن تالان-تاراجعا سالدى جانە پارا الدى» دەپ ايىپتاپ، 12 جىلعا باس بوستاندىعىنان ايىرعاندىعىن ايتا كەتەيىك.

"The Qazaq Times"