Qazaqstan Iranmen sauda-ekonomikalıq qarım-qatınasın odan arı damıtuğa müddeli.

Memlekettik hatşı Gülşara Äbdihalıqova Irannıñ Qazaqstandağı elşisi Modjtaba Damirçilumen kezdesti. Kezdesu barısında Äbdihalıqova hanım: «Biz Iranmen sauda-ekonomikalıq qarım-qatınastı odan arı damıtuğa müddelimiz. 2018 jıldıñ qañtar jäne mamır ayları aralığındağı tauar aynalımı 251,4 million dollardı qwradı. Bwl bıltırğı jıldıñ däl osı merzimimen salıstırğanda 47,7 payızğa köp» - dep mälimdegen.

Esteriñizge salayıq, tamız ayınıñ 7-inen bastap AQŞ-tıñ Iranğa salğan sankciyaları küşine engen. Bwl jolğı sankciyalar tizimine Irannıñ kilem öndirisinen bastap, qarapayım wşaq bölşekterin importtauına deyingi aralıqtağı dünieler engen.

Jalpı, AQŞ-tıñ Resey men Iranğa salğan sankciyalarınıñ Qazaqstanğa qanşalıqtı äser etetindigi äzirge belgisiz. Biraq sarapşılar pikirinşe, AQŞ sankciyalarınıñ Qazaqstan ekonomikasına tikeley äseri bolmasa da, janama äseri mindetti türde boladı. Sebebi Qazaqstan sauda-ekonomikalıq twrğıda joğarıda atalğan eki memleketpen de tığız baylanıs ornatqan.

“The Qazaq Times”