قازاقستان يرانمەن ساۋدا-ەكونوميكالىق قارىم-قاتىناسىن ودان ارى دامىتۋعا مۇددەلى.

مەملەكەتتىك حاتشى گۇلشارا ابدىحالىقوۆا يراننىڭ قازاقستانداعى ەلشىسى مودجتابا داميرچيلۋمەن كەزدەستى. كەزدەسۋ بارىسىندا ابدىحالىقوۆا حانىم: «ءبىز يرانمەن ساۋدا-ەكونوميكالىق قارىم-قاتىناستى ودان ارى دامىتۋعا مۇددەلىمىز. 2018 جىلدىڭ قاڭتار جانە مامىر ايلارى ارالىعىنداعى تاۋار اينالىمى 251,4 ميلليون دوللاردى قۇرادى. بۇل بىلتىرعى جىلدىڭ ءدال وسى مەرزىمىمەن سالىستىرعاندا 47,7 پايىزعا كوپ» - دەپ مالىمدەگەن.

ەستەرىڭىزگە سالايىق، تامىز ايىنىڭ 7-ىنەن باستاپ اقش-تىڭ يرانعا سالعان سانكتسيالارى كۇشىنە ەنگەن. بۇل جولعى سانكتسيالار تىزىمىنە يراننىڭ كىلەم وندىرىسىنەن باستاپ، قاراپايىم ۇشاق بولشەكتەرىن يمپورتتاۋىنا دەيىنگى ارالىقتاعى دۇنيەلەر ەنگەن.

جالپى، اقش-تىڭ رەسەي مەن يرانعا سالعان سانكتسيالارىنىڭ قازاقستانعا قانشالىقتى اسەر ەتەتىندىگى ازىرگە بەلگىسىز. بىراق ساراپشىلار پىكىرىنشە، اقش سانكتسيالارىنىڭ قازاقستان ەكونوميكاسىنا تىكەلەي اسەرى بولماسا دا، جاناما اسەرى مىندەتتى تۇردە بولادى. سەبەبى قازاقستان ساۋدا-ەكونوميكالىق تۇرعىدا جوعارىدا اتالعان ەكى مەملەكەتپەن دە تىعىز بايلانىس ورناتقان.

“The Qazaq Times”