Qazaq jastarın ne mazalaydı?

Ükimet dağdarıspen küresip jürgende «Z» zamanınıñ jastarı ösip-jetildi. Qazirgi tañda qazaq jastarın ne mazalaydı?  Olar öz bolaşağın qalay elestetedi? Jastar qay bağıtta ketip baradı?

Narhoz universitetiniñ bir top jas ğalımdarı 14 pen 17 jas aralığındağı «Z» zamanı wrpaqtarı arasında äleumettik saualnama jürgizgen. Qazaqstannıñ 4 qalasında 1600-den astam jasöspirimnen saualnama alğan jas ğalımdar mınanday qorıtındı şığarğan:

1. Qazirgi tañda qazaq jastarı üşin birinşi orında otbası, densaulıq jäne mansap twr. Bwdan bölek mektep jasındağı buın özderiniñ ağa-apaylarına qarağanda sportqa, dwrıs tamaqtanuğa, dietağa köbirek köñil böledi.

2. Saualnamağa qatısqan jastardıñ 41 payızı jeke menşik kompaniyalardıñ, universitetterdiñ grantın wtıp alamın dep oylaydı. Al 13 payızı memlekettik granttardıñ esebinen oqığandı qalaydı. Biraq basım köpşiligi bastısı bilim emes tamır-tanıs dep esepteydi jäne özderiniñ ata-analarınan köbirek qarjı tabamın dep oylaydı.

3. Mektep jasındağı jastar üşin eñ qiın kezeñ WBT uaqıtı. Olardıñ basım köpşiligi öz bolaşağına senbeydi jäne däl qazirgi äleumettik-ekonomikalıq jağdayda özderiniñ oylağan oyların iske asıru mümkin emes dep esepteydi.

4. 14 pen 17 jas aralığındağı «Z» zamanı wrpaqtarınıñ oyınşa, qoğamnıñ damuına kedergi bolıp twrğan - jemqorlıq.

5. Jastar arasında individualizm basım. Mektep jasındağı jastardıñ basım köpşiligi öziniñ jeke basın oylaydı. Qoğamdıq jwmıstarmen, jalpığa ortaq istermen aynalısqısı kelmeydi.

“The Qazaq Times”