Teñgiz satıp alğan tapanşa. Foto: GETTY IMAGES/BBC.

Keşe AQŞ Virdjiniya ştatınıñ  Federaldıq prokuraturası «Şeşenstanğa zañsız qaru-jaraq jetkizgen» degen ayıppen eki adamdı qamauğa alğanın mälimdedi. Olardıñ biri  27 jastağı qazaqstandıq El'dar Rezvanov jäne 28 jastağı Teñgiz Sıdıqov attı qırğızstandıq azamat. Sıdıqov tergeu isi ayaqtalğanşa bostandıqqa jiberilgen. Al, qazaqstandıq küdikti äli de qamauda otır. Bwl turalı "Azattıq" jäne BBC onlayn qızmeti habarladı.

Atalğan isti Virdjiniyadağı Aleksandriya qalasınıñ sotı qarap jatır. AQŞ İşki qauipsizdik ministrliginiñ tergeuşisi Maykl Gruçaş tergeu mälimetterin jariyalağan. Bwl mälimetterde tergeuge alınğan eki azamat özderimen sıbaylas tağı birneşe adamnıñ bar ekenin moyındağan. Olar şeteldik bankter arqılı AQŞ-qa aqşa jöneltedi, al tergeuge alınğan eki azamat bwl aqşanı qaru-jaraq satıp aluğa jwmsağan. Gruçaştıñ tergeu tobı birqatar ayıptardı alğa tarttı.

Tergeuşiler basında twtqınğa tüsken qazaqstandıq azamat El'dar Rezvanovtıñ  wltın qırğız dep körsetken, biraq Gruçaştıñ soñğı mälimetinde onıñ qazaq ekeni aytıldı. El'dar Rezvanov pen Teñgiz Sıdıqov 2016 jıldıñ 6-7 jeltoqsan künderi Qırğızstannan Reseyge zat jötkegen. Bwl zattardı "ashana bwyımdarı" jäne "rezeñke layner" dep körsetedi. Alayda, Qwrama Ştat tergeuşileri bwl zattardıñ qaru-jaraq boluı mümkin dep otır.

Tergeude mälim bolğanınday, Teñgiz Sıdıqov 2017 jıldıñ 12 aqpanda Virdjiniya ştatında FN Herstal ülgisindegi eki tapanşa satıp aladı. 10 mamır küni 24 dana "Bullets-17" qaruın, 19 dana Gen 3 tapanşasın alğan. Al, 5 qazanda Desert Eagle 357"  tapanşasın satıp alğan. Ol Qırğızstanğa 15 mausımda wşıp keledi de, 1 şildede AQŞ-qa qaytıp barğan. Tergeuşiler bwl saparına da ülken küdik artıp otır.

Teñgizge qaru satıp bergen qaru-jaraq dükeni «Gun Dude» attı dükenniñ administraciyası onıñ qwraldı qanday maqsatta paydalanatının bilgisi kelgen. Sebebi, bir jolı Teñgiz 64 "Golk" tapanşasın satıp alğan. Ol Virdjiniyada küzet kompaniyasınıñ bar ekenin aytqan, şın mänisinde eşqanday küzet kompaniyası bolmağan.

Gruçaştıñ tergeu materialdarındağı aqparatqa qarağanda, Teñgizdiñ minip jürgen «Mersedes» avtoköliginde sottıñ rwqsatı berligen radiomayag jäne jasırın navigator bolğan. Ol jäne Virdjiniya ştatında Damir Mur degen jalğan attı paydalanğan. Al, El'dar Rezvanov bolsa Anton Işutin degen esimdi paydalanğan. Olar qaru-jaraqtıñ bölşekterin poşta arqılı jöneltip otırğan. Poştamen de salmaqtı jäşikterdi tezden jöneltip twruğa kelisim jasasqan. Bwl jäşikterdiñ birine: «Groznıy qalası, Bilsan Majievke» dep jazılğan. Al joldauşı adamnıñ atı Dayana Svetova dep körsetilgen. Biraq ondağı joldauşı jäne tapsırıp aluşı adamdardıñ esimderi jalğan ekeni anıqtalğan.

Poşta arqılı jiberilgen bir jäşikti aşıp körgen tergeuşiler, onda basqa zattarğa aralastırıp salınğan qaru-jaraqtıñ bölşekterin tauıp alğan. Bwl zattarda El'dar Rezvanovtıñ sausaq bederi bolğanı rastaldı. Olar mwnday jolmen köp mölşerde zattar jiberip twrğan.

BBC tilşileri Teñgiz Sıdıqovtıñ anasımen swhbat ötkizgen. Basılımnıñ mälimetinşe, onıñ anası Zamira Sıdıqova Qırğızstannıñ AQŞ-tağı elşisi qızmetin atqarğan, qazir «Respublika» basılımınıñ jetekşisi. "Zamira Sıdıqova balasınıñ kinäsiz ekenine senimdi. Tek,  El'dar Rezvanovpen bir päterde twrğan jäne baylanıs jasağan adam bolğanı üşin twtqındalğan boluı mümkin dep qaraydı. Äri Qwrama Ştat zañı men sotı balasınıñ qwqığın bwzbaydı degen ümitte", - dep jazılğan aqparatta.

“The Qazaq Times”