تەڭگيز ساتىپ العان تاپانشا. فوتو: GETTY IMAGES/BBC.

كەشە اقش ۆيردجينيا شتاتىنىڭ  فەدەرالدىق پروكۋراتۋراسى «شەشەنستانعا زاڭسىز قارۋ-جاراق جەتكىزگەن» دەگەن ايىپپەن ەكى ادامدى قاماۋعا العانىن مالىمدەدى. ولاردىڭ ءبىرى  27 جاستاعى قازاقستاندىق ەلدار رەزۆانوۆ جانە 28 جاستاعى تەڭگيز سىدىقوۆ اتتى قىرعىزستاندىق ازامات. سىدىقوۆ تەرگەۋ ءىسى اياقتالعانشا بوستاندىققا جىبەرىلگەن. ال، قازاقستاندىق كۇدىكتى ءالى دە قاماۋدا وتىر. بۇل تۋرالى "ازاتتىق" جانە BBC ونلاين قىزمەتى حابارلادى.

اتالعان ءىستى ۆيردجينياداعى الەكساندريا قالاسىنىڭ سوتى قاراپ جاتىر. اقش ىشكى قاۋىپسىزدىك مينيسترلىگىنىڭ تەرگەۋشىسى مايكل گرۋچاش تەرگەۋ مالىمەتتەرىن جاريالاعان. بۇل مالىمەتتەردە تەرگەۋگە الىنعان ەكى ازامات وزدەرىمەن سىبايلاس تاعى بىرنەشە ادامنىڭ بار ەكەنىن مويىنداعان. ولار شەتەلدىك بانكتەر ارقىلى اقش-قا اقشا جونەلتەدى، ال تەرگەۋگە الىنعان ەكى ازامات بۇل اقشانى قارۋ-جاراق ساتىپ الۋعا جۇمساعان. گرۋچاشتىڭ تەرگەۋ توبى بىرقاتار ايىپتاردى العا تارتتى.

تەرگەۋشىلەر باسىندا تۇتقىنعا تۇسكەن قازاقستاندىق ازامات ەلدار رەزۆانوۆتىڭ  ۇلتىن قىرعىز دەپ كورسەتكەن، بىراق گرۋچاشتىڭ سوڭعى مالىمەتىندە ونىڭ قازاق ەكەنى ايتىلدى. ەلدار رەزۆانوۆ پەن تەڭگيز سىدىقوۆ 2016 جىلدىڭ 6-7 جەلتوقسان كۇندەرى قىرعىزستاننان رەسەيگە زات جوتكەگەن. بۇل زاتتاردى "اسحانا بۇيىمدارى" جانە "رەزەڭكە لاينەر" دەپ كورسەتەدى. الايدا، قۇراما شتات تەرگەۋشىلەرى بۇل زاتتاردىڭ قارۋ-جاراق بولۋى مۇمكىن دەپ وتىر.

تەرگەۋدە ءمالىم بولعانىنداي، تەڭگيز سىدىقوۆ 2017 جىلدىڭ 12 اقپاندا ۆيردجينيا شتاتىندا FN Herstal ۇلگىسىندەگى ەكى تاپانشا ساتىپ الادى. 10 مامىر كۇنى 24 دانا "Bullets-17" قارۋىن، 19 دانا Gen 3 تاپانشاسىن العان. ال، 5 قازاندا Desert Eagle 357"  تاپانشاسىن ساتىپ العان. ول قىرعىزستانعا 15 ماۋسىمدا ۇشىپ كەلەدى دە، 1 شىلدەدە اقش-قا قايتىپ بارعان. تەرگەۋشىلەر بۇل ساپارىنا دا ۇلكەن كۇدىك ارتىپ وتىر.

تەڭگيزگە قارۋ ساتىپ بەرگەن قارۋ-جاراق دۇكەنى «Gun Dude» اتتى دۇكەننىڭ ادمينيستراتسياسى ونىڭ قۇرالدى قانداي ماقساتتا پايدالاناتىنىن بىلگىسى كەلگەن. سەبەبى، ءبىر جولى تەڭگيز 64 "گولك" تاپانشاسىن ساتىپ العان. ول ۆيردجينيادا كۇزەت كومپانياسىنىڭ بار ەكەنىن ايتقان، شىن مانىسىندە ەشقانداي كۇزەت كومپانياسى بولماعان.

گرۋچاشتىڭ تەرگەۋ ماتەريالدارىنداعى اقپاراتقا قاراعاندا، تەڭگيزدىڭ ءمىنىپ جۇرگەن «مەرسەدەس» اۆتوكولىگىندە سوتتىڭ رۇقساتى بەرلىگەن راديوماياگ جانە جاسىرىن ناۆيگاتور بولعان. ول جانە ۆيردجينيا شتاتىندا دامير مۋر دەگەن جالعان اتتى پايدالانعان. ال، ەلدار رەزۆانوۆ بولسا انتون يشۋتين دەگەن ەسىمدى پايدالانعان. ولار قارۋ-جاراقتىڭ بولشەكتەرىن پوشتا ارقىلى جونەلتىپ وتىرعان. پوشتامەن دە سالماقتى جاشىكتەردى تەزدەن جونەلتىپ تۇرۋعا كەلىسىم جاساسقان. بۇل جاشىكتەردىڭ بىرىنە: «گروزنىي قالاسى، بيلسان ماجيەۆكە» دەپ جازىلعان. ال جولداۋشى ادامنىڭ اتى دايانا سۆەتوۆا دەپ كورسەتىلگەن. بىراق ونداعى جولداۋشى جانە تاپسىرىپ الۋشى ادامداردىڭ ەسىمدەرى جالعان ەكەنى انىقتالعان.

پوشتا ارقىلى جىبەرىلگەن ءبىر جاشىكتى اشىپ كورگەن تەرگەۋشىلەر، وندا باسقا زاتتارعا ارالاستىرىپ سالىنعان قارۋ-جاراقتىڭ بولشەكتەرىن تاۋىپ العان. بۇل زاتتاردا ەلدار رەزۆانوۆتىڭ ساۋساق بەدەرى بولعانى راستالدى. ولار مۇنداي جولمەن كوپ مولشەردە زاتتار جىبەرىپ تۇرعان.

BBC تىلشىلەرى تەڭگيز سىدىقوۆتىڭ اناسىمەن سۇحبات وتكىزگەن. باسىلىمنىڭ مالىمەتىنشە، ونىڭ اناسى زاميرا سىدىقوۆا قىرعىزستاننىڭ اقش-تاعى ەلشىسى قىزمەتىن اتقارعان، قازىر «رەسپۋبليكا» باسىلىمىنىڭ جەتەكشىسى. "زاميرا سىدىقوۆا بالاسىنىڭ كىناسىز ەكەنىنە سەنىمدى. تەك،  ەلدار رەزۆانوۆپەن ءبىر پاتەردە تۇرعان جانە بايلانىس جاساعان ادام بولعانى ءۇشىن تۇتقىندالعان بولۋى مۇمكىن دەپ قارايدى. ءارى قۇراما شتات زاڭى مەن سوتى بالاسىنىڭ قۇقىعىن بۇزبايدى دەگەن ۇمىتتە", - دەپ جازىلعان اقپاراتتا.

“The Qazaq Times”