Foto: stan.kz

Aqpan ayınıñ 10-ı küni Qazaqstan Respublikasınıñ prezidenti Nwrswltan Nazarbaevtıñ jarlığı boyınşa Madina Äbilqasımova Eñbek jäne halıqtı äleumettik qorğau ministri bolıp tağayındaldı. Ol «jwmıs isteuden şarşağan» ministr Tamara Düysenovanıñ ornın bastı.

Ötken aptada BAQ ökilderi prezident Nwrswltan Nazarbaevtıñ Eñbek jäne halıqtı äleumettik qorğau ministri Tamara Düysenovağa «Ne boldı endi sağan Tamara? Älde şarşadıñ ba sen mına jwmıstan?» - degen sözin jarısa jazdı. Biri ministr hanımdı jaqtadı, biri dattadı. Osıdan keyin köp wzamay ol qızmetinen ketip, onıñ ornına bwrın soñdı halıqtıñ nazarına köp ilige bermegen Madina Äbilqasımova keldi. Jurnalister ile-şala «su jaña ministr kim?» - degen swraqqa jauap izdey bastadı. Ol swraqtıñ jauabı köp wzamay tabıldı. Jwrt qaydan kelgenin bilmey jürgen Madina hanım 2005 jılı prezident saylauına qatısqan Erasıl Äbilqasımovtıñ qızı bolıp şıqtı. «Alma alma ağaştan alısqa qwlamaydı» degen qağidanı eskeretin bolsaq, Madina Äbilqasımovanıñ ministr bolıp tağayındaluı zañdılıq deuge bolatın şığar. Biraq bwl jerde zañdılıqtan bwrın, elbasınıñ kemeñgerligine, keñ jürektiligine tañ qalasıñ. Aytıñızşı, osığan deyin qay eldiñ prezidenti özine qarsı prezident saylauına qatısqan sayasatkerdiñ qızın ministr etip tağayındadı? Eşbir elde bwnday jağday bolğan joq. Bwl da tarihi sät desek artıq aytpaspız. Biraq ökinişke oray sağat sayın tarihi sätke kuä bolatın ministrler kabineti bwl jolı bwnı halıqqa öz deñgeyinde tüsindirip, nasihattap ülgergen joq.

Jalpı, Madina Äbilqasımova osığan deyin 2013-2014 jıldarı aralığında QR Ekonomika jäne byudjetti josparlau vice-ministri, 2014 jıldan 2018 jıldıñ aqpan ayına deyin Wlttıq ekonomika vice-ministri qızmetterin atqarğan. Ol jerlerde su jaña ministrdiñ qanşalıqtı deñgeyde jwmıs istegeni bizge belgisiz. Biraq soñğı bir aptadağı jwmıs qarqınına qarap Madina hanımnıñ bwğan deyin de jaman qızmet istemegenin bayqaymız. Ol öziniñ ministr retinde qatısqan alğaşqı ükimet otırısında prem'er-ministr Baqıtjan Sağıntaev pen özge de äriptesteri aldında bayandama jasadı. Onda ol: «5 jıl boyı jwmıssızdar mäselesin şeşe almağan eks-ministr Tamara Düysenovanıñ qateligin qaytalamaymın. Bizde şamamen 2-3 million özin özi jwmıspen qamtamasız etip jürgen adam bar. Olar eşqanday salıq tölemeydi, zeynetaqı qorına qarjı audarmaydı. Mindetti saqtandıru qorına da qatısa almaydı. Biz osını retteu üşin jaña zañ äzirlep jatırmız» - dedi. Bir sözben aytqanda Madina Äbilqasımova jaña qızmetine «bilek sıbana» kiriskenin bayqattı. Biraq bwl zañ jobası äzirlenbey jatıp halıq narazılığına tap boldı. Halıqtıñ bwnday qarsılıq körsetuine negiz de joq emes. Sebebi osığan deyin 3 million halıqtı «özin özi jwmıspen qamtığandar» tizimine kirgizip tastağan Eñbek jäne halıqtı äleumettik qorğau ministrligi endi sol halıqqa salıq töletpek.  Madina Äbilqasımovanıñ kele salıp jasağan mälimdemelerine qarap, halıqtı su jaña ministrdiñ özinen qorğaytın bölek bir ministrlik qwru kerek şığar? - degen oyğa kelesiñ.

“The Qazaq Times”