الەۋمەتتىك قورعاۋ مينيسترلىگىنەن الەۋمەتتى كىم قورعايدى؟

اقپان ايىنىڭ 10-ى كۇنى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جارلىعى بويىنشا مادينا ابىلقاسىموۆا ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالدى. ول «جۇمىس ىستەۋدەن شارشاعان» مينيستر تامارا دۇيسەنوۆانىڭ ورنىن باستى.

وتكەن اپتادا باق وكىلدەرى پرەزيدەنت نۇرسۇلتان نازارباەۆتىڭ ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆاعا «نە بولدى ەندى ساعان تامارا؟ الدە شارشادىڭ با سەن مىنا جۇمىستان؟» - دەگەن ءسوزىن جارىسا جازدى. ءبىرى مينيستر حانىمدى جاقتادى، ءبىرى داتتادى. وسىدان كەيىن كوپ ۇزاماي ول قىزمەتىنەن كەتىپ، ونىڭ ورنىنا بۇرىن سوڭدى حالىقتىڭ نازارىنا كوپ ىلىگە بەرمەگەن مادينا ابىلقاسىموۆا كەلدى. جۋرناليستەر ىلە-شالا «سۋ جاڭا مينيستر كىم؟» - دەگەن سۇراققا جاۋاپ ىزدەي باستادى. ول سۇراقتىڭ جاۋابى كوپ ۇزاماي تابىلدى. جۇرت قايدان كەلگەنىن بىلمەي جۇرگەن مادينا حانىم 2005 جىلى پرەزيدەنت سايلاۋىنا قاتىسقان ەراسىل ابىلقاسىموۆتىڭ قىزى بولىپ شىقتى. «الما الما اعاشتان الىسقا قۇلامايدى» دەگەن قاعيدانى ەسكەرەتىن بولساق، مادينا ابىلقاسىموۆانىڭ مينيستر بولىپ تاعايىندالۋى زاڭدىلىق دەۋگە بولاتىن شىعار. بىراق بۇل جەردە زاڭدىلىقتان بۇرىن، ەلباسىنىڭ كەمەڭگەرلىگىنە، كەڭ جۇرەكتىلىگىنە تاڭ قالاسىڭ. ايتىڭىزشى، وسىعان دەيىن قاي ەلدىڭ پرەزيدەنتى وزىنە قارسى پرەزيدەنت سايلاۋىنا قاتىسقان ساياساتكەردىڭ قىزىن مينيستر ەتىپ تاعايىندادى؟ ەشبىر ەلدە بۇنداي جاعداي بولعان جوق. بۇل دا تاريحي ءسات دەسەك ارتىق ايتپاسپىز. بىراق وكىنىشكە وراي ساعات سايىن تاريحي ساتكە كۋا بولاتىن مينيسترلەر كابينەتى بۇل جولى بۇنى حالىققا ءوز دەڭگەيىندە ءتۇسىندىرىپ، ناسيحاتتاپ ۇلگەرگەن جوق.

جالپى، مادينا ابىلقاسىموۆا وسىعان دەيىن 2013-2014 جىلدارى ارالىعىندا قر ەكونوميكا جانە بيۋدجەتتى جوسپارلاۋ ۆيتسە-ءمينيسترى، 2014 جىلدان 2018 جىلدىڭ اقپان ايىنا دەيىن ۇلتتىق ەكونوميكا ۆيتسە-ءمينيسترى قىزمەتتەرىن اتقارعان. ول جەرلەردە سۋ جاڭا ءمينيستردىڭ قانشالىقتى دەڭگەيدە جۇمىس ىستەگەنى بىزگە بەلگىسىز. بىراق سوڭعى ءبىر اپتاداعى جۇمىس قارقىنىنا قاراپ مادينا حانىمنىڭ بۇعان دەيىن دە جامان قىزمەت ىستەمەگەنىن بايقايمىز. ول ءوزىنىڭ مينيستر رەتىندە قاتىسقان العاشقى ۇكىمەت وتىرىسىندا پرەمەر-مينيستر باقىتجان ساعىنتاەۆ پەن وزگە دە ارىپتەستەرى الدىندا بايانداما جاسادى. وندا ول: «5 جىل بويى جۇمىسسىزدار ماسەلەسىن شەشە الماعان ەكس-مينيستر تامارا دۇيسەنوۆانىڭ قاتەلىگىن قايتالامايمىن. بىزدە شامامەن 2-3 ميلليون ءوزىن ءوزى جۇمىسپەن قامتاماسىز ەتىپ جۇرگەن ادام بار. ولار ەشقانداي سالىق تولەمەيدى، زەينەتاقى قورىنا قارجى اۋدارمايدى. مىندەتتى ساقتاندىرۋ قورىنا دا قاتىسا المايدى. ءبىز وسىنى رەتتەۋ ءۇشىن جاڭا زاڭ ازىرلەپ جاتىرمىز» - دەدى. ءبىر سوزبەن ايتقاندا مادينا ابىلقاسىموۆا جاڭا قىزمەتىنە «بىلەك سىبانا» كىرىسكەنىن بايقاتتى. بىراق بۇل زاڭ جوباسى ازىرلەنبەي جاتىپ حالىق نارازىلىعىنا تاپ بولدى. حالىقتىڭ بۇنداي قارسىلىق كورسەتۋىنە نەگىز دە جوق ەمەس. سەبەبى وسىعان دەيىن 3 ميلليون حالىقتى «ءوزىن ءوزى جۇمىسپەن قامتىعاندار» تىزىمىنە كىرگىزىپ تاستاعان ەڭبەك جانە حالىقتى الەۋمەتتىك قورعاۋ مينيسترلىگى ەندى سول حالىققا سالىق تولەتپەك.  مادينا ابىلقاسىموۆانىڭ كەلە سالىپ جاساعان مالىمدەمەلەرىنە قاراپ، حالىقتى سۋ جاڭا ءمينيستردىڭ وزىنەن قورعايتىن بولەك ءبىر مينيسترلىك قۇرۋ كەرەك شىعار؟ - دەگەن ويعا كەلەسىڭ.

“The Qazaq Times”