Foto: Alau-TV

Bwdan keyin memlekettik qarız erekşe baqılauğa alınatın boladı. Bwl turalı QR wlttıq ekonomika ministri Timur Süleymenov mälimdedi. 

Vedomstvo basşısınıñ sözinşe, qazirgi kezde memlekettik qarızdıñ deñgeyi jalpı işki önimniñ (ükimettiñ, Wlttıq banktiñ, jergilikti organdardıñ qarızdarı) 26 payızın qwraydı.

"Memlekettik qarız deñgeyi erekşe baqılauğa alınu kerek. Qazirgi kezde bwl qauipsiz deñgeyde, al äleumettik-ekonomikalıq damu boljamı boyınşa qarız 2022 jılğa deyin 23,7 payızğa qısqaradı", - dedi Süleymenov.

Sonday-aq, ol Qazaqstanda Wlttıq qordıñ valyuta qorın paydalanu koncepciyası boyınşa şekteuler (kovenant) bar ekenin atap ötti.

"Qazirgi kezde kovenant 97,5 payızdı qwraydı, sondıqtan bwl mäsele bizdiñ baqılauımızda. Biz birinşi kezekte kvazimemlekettik sektor sub'ektileriniñ sırtqı qarız mölşerin anıqtaytın qosımşanı dayındadıq. Ol qazirgi uaqıtta ädilet ministrliginiñ qarauında, aldağı uaqıtta kancelyariyağa jiberiledi. Sonday-aq, osı jılı barlıq kvazimemlekettik sektorlarmen sırtqı qarız kölemin kelisu jöninde jwmıstar jürgiziledi", - dedi ol.

Ayta keteyik, Wlttıq banktiñ 2017 jıldıñ 1 qazanındağı mälimeti boyınşa Qazaqstannıñ sırtqı qarızı - 168 mlrd dollar. Onıñ işinde memlekettik jäne memleketten kepildik berilgen qarız kölemi 14,125 mlrd dollardı, basqa memlekettik qarız 13,183 mlrd dollardı qwraydı.

“The Qazaq Times”