فوتو: الاۋ-تۆ

بۇدان كەيىن مەملەكەتتىك قارىز ەرەكشە باقىلاۋعا الىناتىن بولادى. بۇل تۋرالى قر ۇلتتىق ەكونوميكا ءمينيسترى تيمۋر سۇلەيمەنوۆ مالىمدەدى. 

ۆەدومستۆو باسشىسىنىڭ سوزىنشە، قازىرگى كەزدە مەملەكەتتىك قارىزدىڭ دەڭگەيى جالپى ىشكى ءونىمنىڭ (ۇكىمەتتىڭ، ۇلتتىق بانكتىڭ، جەرگىلىكتى ورگانداردىڭ قارىزدارى) 26 پايىزىن قۇرايدى.

"مەملەكەتتىك قارىز دەڭگەيى ەرەكشە باقىلاۋعا الىنۋ كەرەك. قازىرگى كەزدە بۇل قاۋىپسىز دەڭگەيدە، ال الەۋمەتتىك-ەكونوميكالىق دامۋ بولجامى بويىنشا قارىز 2022 جىلعا دەيىن 23,7 پايىزعا قىسقارادى", - دەدى سۇلەيمەنوۆ.

سونداي-اق، ول قازاقستاندا ۇلتتىق قوردىڭ ۆاليۋتا قورىن پايدالانۋ كونتسەپتسياسى بويىنشا شەكتەۋلەر (كوۆەنانت) بار ەكەنىن اتاپ ءوتتى.

"قازىرگى كەزدە كوۆەنانت 97,5 پايىزدى قۇرايدى، سوندىقتان بۇل ماسەلە ءبىزدىڭ باقىلاۋىمىزدا. ءبىز ءبىرىنشى كەزەكتە كۆازيمەملەكەتتىك سەكتور سۋبەكتىلەرىنىڭ سىرتقى قارىز مولشەرىن انىقتايتىن قوسىمشانى دايىندادىق. ول قازىرگى ۋاقىتتا ادىلەت مينيسترلىگىنىڭ قاراۋىندا، الداعى ۋاقىتتا كانتسەليارياعا جىبەرىلەدى. سونداي-اق، وسى جىلى بارلىق كۆازيمەملەكەتتىك سەكتورلارمەن سىرتقى قارىز كولەمىن كەلىسۋ جونىندە جۇمىستار جۇرگىزىلەدى", - دەدى ول.

ايتا كەتەيىك، ۇلتتىق بانكتىڭ 2017 جىلدىڭ 1 قازانىنداعى مالىمەتى بويىنشا قازاقستاننىڭ سىرتقى قارىزى - 168 ملرد دوللار. ونىڭ ىشىندە مەملەكەتتىك جانە مەملەكەتتەن كەپىلدىك بەرىلگەن قارىز كولەمى 14,125 ملرد دوللاردى، باسقا مەملەكەتتىك قارىز 13,183 ملرد دوللاردى قۇرايدى.

“The Qazaq Times”