Özbekstan Wlttıq qauipsizdik qızmetiniñ basşısı Rustam Inoyatovtıñ Birikken Arab Ämirlikterine 12 million dollar qarjı salğanı anıqtaldı – dep habarlaydı Ferğana aqaparat agenttigi.

Agenttik mälimetinşe, Rustam Inoyatov 2017 jıldıñ naurız ayınıñ 22-si küni Birikken Arab Ämirlikterinde şeyh Mansur ibn Zayd äl-Nahayanmen kezdesken. Özbekstannıñ resmi BAQ ökilderi taratqan aqparat boyınşa, Inoyatov pen äl-Nahayan eki el arasındağı äriptestikti damıtu jöninde kelissözder jürgizgen.

Biraq OSI Aşıq tekseru (Open Source Investigation) jobasınıñ ökilderi resmi mälimdemelermen kelispeydi. Olardıñ oyınşa, Inoyatov memlekettik qızmetin paydalanu arqılı öziniñ Dubaydağı biznesin basqarıp otır. Ol naurız ayında Birikken Arab Ämirlikterinde şeyh Mansur ibn Zayd äl-Nahayanmen resmi emes kezdesu ötkizgen. Atalmış kezdesuden keyin 4 aydan soñ 2017 jıldıñ tamız ayında «Capital Engineering Consultancy» kompaniyası Dubay qalasınıñ Jebel Ali Industrial-1 meken-jayında qwnı 12 million dollarlıq bes qabattı ğimarattıñ qwrılısın bastaytındığın mälimdegen. Al ol ğimarat Rustam Inoyatovtıñ küyeubalası Bahtiyar Irgaşevtıñ atına tirkelgen. Bwdan bölek Irgaşevtıñ esimi Rustam Inoyatovtıñ wlı Şarif Inoyatovtıñ Avstriyada tirkelgen «Benif Handels» kompaniyasınıñ qwjattarında kompaniya basşısınıñ biznes äriptesi retinde körsetilgen.

“The Qazaq Times”