Foto: gazeta.ru

2017 jıldıñ 30 jeltoqsanındağı mälimet boyınşa Qazaqstanda 47 111 kölik qayta öñdeuge tapsırılğan. Eski kölikterdi satıp alu bağdarlaması ayasında (kölik bölşekteri tolıq bolsa 150 mıñ teñge, tolıq bolmasa 48 mıñ teñge ötemaqı töleu qarasıtırılğan) 2016 jıldıñ 21 qaraşası men 2017 jıldıñ 30 jeltoqsan aralığında öndiruşilerdiñ keñeytilgen mindettemeleri operatorı (ÖKM operatorı) punkterinde 39 872 kölik jinalğan. Kölikti tapsırğandarğa tölengen aqşalay ötemaqı kölemi 5,98 mlrd teñge bolğan. Bwl turalı ÖKM operatorınıñ baspasöz qızmeti habarladı. 

Al eski kölikterdi jinaudıñ ekinşi kezeñi jaña kölikterdi satıp alu üşin jeñildik sertifikattarın beretin bağdarlamamen jalğastı. Atalğan qayta öñdeu bağdarlaması 2017 jıldıñ 26 mausımınan bastap qolğa alınğan. Bağdarlama şartına säykes, qayta öñdeuge eski jeñil kölikter men jolauşılar men jük tasımaldauğa arnalğan transporttar qabıldanadı. Tapsırılğan köliktiñ ornına Qazaqstanda qwrastırılğan ekologiyalıq taza jaña kölikti satıp aluğa jeñildik sertifikatı beriledi.

Sonımen ötken jıldıñ 26 mausımı men 30 jeltoqsan aralığında 7 239 jeñildik sertifikatı berilgen. Onıñ işinde 5213 sertifikat paydalanılıp, ieleri otandıq jaña kölikter satıp alğan.

Sertifikat üşin eski kölikterin tapsırğandardıñ köbi Şımkent twrğındarı. Bwl öñirde sertifikat bağdarlaması ayasında 1 216 kölik tapsırılğan. Odan keyin Qostanaydan 971 kölik qabıldanğan. Üşinşi orında Almatı - 867 eski kölik jeñildik sertifikatına ayırbastalğan.

Tapsırılğan kölikterdiñ işinde eñ tanımal kölik markaları: VAZ-2105, VAZ-2106, VAZ-2101, GAZ-3110, «Moskviç-2140» jäne «Mazda 626». Jası eñ ülkeni 1942 jılı şıqqan «Moskviç» köligi.

“The Qazaq Times”