فوتو: gazeta.ru

2017 جىلدىڭ 30 جەلتوقسانىنداعى مالىمەت بويىنشا قازاقستاندا 47 111 كولىك قايتا وڭدەۋگە تاپسىرىلعان. ەسكى كولىكتەردى ساتىپ الۋ باعدارلاماسى اياسىندا (كولىك بولشەكتەرى تولىق بولسا 150 مىڭ تەڭگە، تولىق بولماسا 48 مىڭ تەڭگە وتەماقى تولەۋ قاراسىتىرىلعان) 2016 جىلدىڭ 21 قاراشاسى مەن 2017 جىلدىڭ 30 جەلتوقسان ارالىعىندا وندىرۋشىلەردىڭ كەڭەيتىلگەن مىندەتتەمەلەرى وپەراتورى (وكم وپەراتورى) پۋنكتەرىندە 39 872 كولىك جينالعان. كولىكتى تاپسىرعاندارعا تولەنگەن اقشالاي وتەماقى كولەمى 5,98 ملرد تەڭگە بولعان. بۇل تۋرالى وكم وپەراتورىنىڭ ءباسپاسوز قىزمەتى حابارلادى. 

ال ەسكى كولىكتەردى جيناۋدىڭ ەكىنشى كەزەڭى جاڭا كولىكتەردى ساتىپ الۋ ءۇشىن جەڭىلدىك سەرتيفيكاتتارىن بەرەتىن باعدارلامامەن جالعاستى. اتالعان قايتا وڭدەۋ باعدارلاماسى 2017 جىلدىڭ 26 ماۋسىمىنان باستاپ قولعا الىنعان. باعدارلاما شارتىنا سايكەس، قايتا وڭدەۋگە ەسكى جەڭىل كولىكتەر مەن جولاۋشىلار مەن جۇك تاسىمالداۋعا ارنالعان ترانسپورتتار قابىلدانادى. تاپسىرىلعان كولىكتىڭ ورنىنا قازاقستاندا قۇراستىرىلعان ەكولوگيالىق تازا جاڭا كولىكتى ساتىپ الۋعا جەڭىلدىك سەرتيفيكاتى بەرىلەدى.

سونىمەن وتكەن جىلدىڭ 26 ماۋسىمى مەن 30 جەلتوقسان ارالىعىندا 7 239 جەڭىلدىك سەرتيفيكاتى بەرىلگەن. ونىڭ ىشىندە 5213 سەرتيفيكات پايدالانىلىپ، يەلەرى وتاندىق جاڭا كولىكتەر ساتىپ العان.

سەرتيفيكات ءۇشىن ەسكى كولىكتەرىن تاپسىرعانداردىڭ كوبى شىمكەنت تۇرعىندارى. بۇل وڭىردە سەرتيفيكات باعدارلاماسى اياسىندا 1 216 كولىك تاپسىرىلعان. ودان كەيىن قوستانايدان 971 كولىك قابىلدانعان. ءۇشىنشى ورىندا الماتى - 867 ەسكى كولىك جەڭىلدىك سەرتيفيكاتىنا ايىرباستالعان.

تاپسىرىلعان كولىكتەردىڭ ىشىندە ەڭ تانىمال كولىك ماركالارى: ۆاز-2105, ۆاز-2106, ۆاز-2101, گاز-3110, «موسكۆيچ-2140» جانە «مازدا 626». جاسى ەڭ ۇلكەنى 1942 جىلى شىققان «موسكۆيچ» كولىگى.

“The Qazaq Times”