Foto: muftyat.kz

Bügin Almatı qalasında Qazaqstan mwsılmandarınıñ kezekti VIII qwrıltayı ötti. Qwrıltayda Qazaqstan Mwsılmandarı Dini Basqarmasınıñ törağası Erjan qajı Malğajıwlı Bas müfti lauazımına naib müfti Serikbay qajı Orazdıñ kandidaturasın wsındı, dep habarlaydı, basqarmanıñ baspasöz qızmeti.

Qwrıltay jwmısına QR Din isteri jäne azamattıq qoğam ministri Nwrlan Baywzaqwlı Ermekbaev, Qazaqstan mwsılmandarı dini basqarması Töralqa müşeleri, Ğwlamalar keñesiniñ müşeleri, teolog-ğalımdar, ziyalı qauım ökilderi, elimizdiñ är oblısınan kelgen qwrıltay delegattarı qatıstı.

Qwrıltay jwmısında Qazaqstan mwsılmandarı dini basqarmasınıñ 2013-2017 jıldar aralığında atqarğan is-şaralarınıñ esebi tıñdaldı.

Serikbay Satıbaldıwlı qwrıltay delegatı aldında dini salada ayanbay qızmet etuge senim bildirdi.

Serikbay Oraz Satıbaldıwlı 1975 jılı  12-säuirde düniege kelgen. 1990-1992 jıldarı Taşkent qalasında qarilar dayındaytın medreseni tamamdağan. 1992-1994 jıldarı Mısırdağı Al'-Azhar universitetinde oqığan. 1995-1996 jıldarı Islamabadtağı Älemdik universitetinde bilim kötergen. Almatı memlekettik Abay atındağı universitetinde zañ fakul'tetin sırttay  bitirgen.

2012-2014 jıldarı "Nwr Mübarak" Islam mädenieti universitetinde "Dintanu" mamandığın tämamdağan. 2012-2014 jıldarı M.Dulatov atındağı Qostanay injenerlik-ekonomikalıq universitetiniñ "Menedjment" mamandığı boyınşa magistraturasın bitirip, ekonomika ğılımdarınıñ magistri akademiyalıq därejesin alğan.

Eñbek  jolın Almatı meşitiniñ  naib imamı bolıp bastağan. Islam institutınıñ wstazı, Islam institutınıñ  rektorı, Astana qalası Aqmola oblısınıñ ökil imamı, QMDB-törağasınıñ orınbasarı, naib müfti, Almatı äkimşiliginiñ dini böliminiñ sektor meñgeruşisi, OQO, Sarıağaş audanınıñ Bas imamı, Memlekettik qızmet agenttiginiñ ağa qızmetkeri, Astana qalası Ädilet departamenti dini ister böliminiñ bas mamanı, QR Prezidenti is basqarmasınıñ Äkimşilik ğimarattar direkciyasınıñ direktorı bolıp jwmıs istedi. Qajılıqqa barğan.

2011-2013 jıldarı Qazaqstan mwsılmandarı dini basqarmasınıñ Qostanay oblısınıñ ökil imamı qızmetin atqardı.2013 jılı naib müfti bolıp tağayındaldı. 2013 jıldıñ qazan ayında «Äziret Swltan» meşitiniñ bas imamı jäne naib müfti bolıp qızmet atqardı. 2017 jıldıñ 8 jeltoqsanında Qazaqstan mwsılmandarınıñ kezekti VIII qwrıltayında Qazaqstan mwsılmandarı dini basqarmasınıñ törağası, Bas müfti lauazımına saylandı.

“The Qazaq Times”