قازاقستاننىڭ باس ءمۇفتيى سايلاندى

بۇگىن الماتى قالاسىندا قازاقستان مۇسىلماندارىنىڭ كەزەكتى VIII قۇرىلتايى ءوتتى. قۇرىلتايدا قازاقستان مۇسىلماندارى ءدىني باسقارماسىنىڭ توراعاسى ەرجان قاجى مالعاجىۇلى باس ءمۇفتي لاۋازىمىنا نايب ءمۇفتي سەرىكباي قاجى ورازدىڭ كانديداتۋراسىن ۇسىندى، دەپ حابارلايدى، باسقارمانىڭ ءباسپاسوز قىزمەتى.

قۇرىلتاي جۇمىسىنا قر ءدىن ىستەرى جانە ازاماتتىق قوعام ءمينيسترى نۇرلان بايۇزاقۇلى ەرمەكباەۆ، قازاقستان مۇسىلماندارى ءدىني باسقارماسى تورالقا مۇشەلەرى، عۇلامالار كەڭەسىنىڭ مۇشەلەرى، تەولوگ-عالىمدار، زيالى قاۋىم وكىلدەرى، ەلىمىزدىڭ ءار وبلىسىنان كەلگەن قۇرىلتاي دەلەگاتتارى قاتىستى.

قۇرىلتاي جۇمىسىندا قازاقستان مۇسىلماندارى ءدىني باسقارماسىنىڭ 2013-2017 جىلدار ارالىعىندا اتقارعان ءىس-شارالارىنىڭ ەسەبى تىڭدالدى.

سەرىكباي ساتىبالدىۇلى قۇرىلتاي دەلەگاتى الدىندا ءدىني سالادا ايانباي قىزمەت ەتۋگە سەنىم ءبىلدىردى.

سەرىكباي وراز ساتىبالدىۇلى 1975 جىلى  12-ساۋىردە دۇنيەگە كەلگەن. 1990-1992 جىلدارى تاشكەنت قالاسىندا قاريلار دايىندايتىن مەدرەسەنى تامامداعان. 1992-1994 جىلدارى مىسىرداعى ال-ازھار ۋنيۆەرسيتەتىندە وقىعان. 1995-1996 جىلدارى يسلامابادتاعى الەمدىك ۋنيۆەرسيتەتىندە ءبىلىم كوتەرگەن. الماتى مەملەكەتتىك اباي اتىنداعى ۋنيۆەرسيتەتىندە زاڭ فاكۋلتەتىن سىرتتاي  بىتىرگەن.

2012-2014 جىلدارى "نۇر مۇباراك" يسلام مادەنيەتى ۋنيۆەرسيتەتىندە ء"دىنتانۋ" ماماندىعىن تامامداعان. 2012-2014 جىلدارى م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىنىڭ "مەنەدجمەنت" ماماندىعى بويىنشا ماگيستراتۋراسىن ءبىتىرىپ، ەكونوميكا عىلىمدارىنىڭ ماگيسترى اكادەميالىق دارەجەسىن العان.

ەڭبەك  جولىن الماتى مەشىتىنىڭ  نايب يمامى بولىپ باستاعان. يسلام ينستيتۋتىنىڭ ۇستازى، يسلام ينستيتۋتىنىڭ  رەكتورى، استانا قالاسى اقمولا وبلىسىنىڭ وكىل يمامى، قمدب-توراعاسىنىڭ ورىنباسارى، نايب ءمۇفتي، الماتى اكىمشىلىگىنىڭ ءدىني ءبولىمىنىڭ سەكتور مەڭگەرۋشىسى، وقو، سارىاعاش اۋدانىنىڭ باس يمامى، مەملەكەتتىك قىزمەت اگەنتتىگىنىڭ اعا قىزمەتكەرى، استانا قالاسى ادىلەت دەپارتامەنتى ءدىني ىستەر ءبولىمىنىڭ باس مامانى، قر پرەزيدەنتى ءىس باسقارماسىنىڭ اكىمشىلىك عيماراتتار ديرەكتسياسىنىڭ ديرەكتورى بولىپ جۇمىس ىستەدى. قاجىلىققا بارعان.

2011-2013 جىلدارى قازاقستان مۇسىلماندارى ءدىني باسقارماسىنىڭ قوستاناي وبلىسىنىڭ وكىل يمامى قىزمەتىن اتقاردى.2013 جىلى نايب ءمۇفتي بولىپ تاعايىندالدى. 2013 جىلدىڭ قازان ايىندا «ازىرەت سۇلتان» مەشىتىنىڭ باس يمامى جانە نايب ءمۇفتي بولىپ قىزمەت اتقاردى. 2017 جىلدىڭ 8 جەلتوقسانىندا قازاقستان مۇسىلماندارىنىڭ كەزەكتى VIII قۇرىلتايىندا قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي لاۋازىمىنا سايلاندى.

“The Qazaq Times”