Foto: kolesa.kz

İşki ister departamenti, sonday-aq Almatı qalasınıñ Äkimdigi Almatı qalasında ötkiziletin 28-şi Bükilälemdik Universiadağa baylanıstı avtokölik ieleriniñ megapolistegi jol qauipsizdigin qamtamasız etuge qatıstı şaralarğa tüsinistikpen qarap, aynalıp ötudiñ balama joldarın aldın ala josparlaudı swraydı, dep habarlaydı "The Qazaq Times" Almatı qalasınıñ İİD Baspasöz-qızmetine silteme jasap.

2017 jıldıñ 25 qañtarınan bastap qalağa kireberis magistraldarda, sonday-aq Universiadanıñ sporttıq nısandarına irgeles jatqan joldarda jük jäne iri gabaritti kölikter qozğalısına şekteu qoyıladı. Büginde megapolis aumağında ornalasqan policiyanıñ stacionarlıq beketterinde tütini men uıttılığı ekologiyalıq normağa say emes, apattıq jäne tehnikalıq aqaulığı añğarılğan kölik qwraldarın anıqtau jöninde jwmıstar küşeytilude. Osı maqsatta Memlekettik kirister Departamenti men birqatar qwqıqqorğau organdarınıñ ökilderi bwl iske qızu kirisip te ketti. Osı jwmısqa qalanıñ 10 stacionarlıq policiya beketterinen özge Almatı oblısınıñ osı ispettes 8 postı da tartılğan.

Sonımen birge, policiya habarlamasında aytılğanday, Universiada sporttıq nısandarı ornalasqan aumaqtarğa baratın joldardağı qozğalıstı şekteu şaraları jol jağdayına oñ äserin tigizip, sportşılarğa, sonday-aq şeteldik delegaciyalardıñ jüris-twrısına qolaylı jağdaylar tuındatadı. Tärtiptiñ saqtaluı öz kezeginde ötip jatqan älemdik şara elimizdiñ bet-beynesine äser etip, twtastay alğanda, memleketimizdiñ bedeliniñ artuına da igi ıqpal jasaydı.

Almatı qalasınıñ İşki ister departamenti zañdılıqtı sıylap, oğan moyınswnğan jol qozğalısına qatısuşılarğa tüsine bilgeni jäne azamattıq közqarası üşin aldın-ala alğıs aytadı.

Eskertu: jol jürisi jönindegi balama keste jaqın aralıqta jariyalanadı.

"The Qazaq Times"