ىشكى ىستەر دەپارتامەنتى، سونداي-اق الماتى قالاسىنىڭ اكىمدىگى الماتى قالاسىندا وتكىزىلەتىن 28-ءشى بۇكىلالەمدىك ۋنيۆەرسياداعا بايلانىستى اۆتوكولىك يەلەرىنىڭ مەگاپوليستەگى جول قاۋىپسىزدىگىن قامتاماسىز ەتۋگە قاتىستى شارالارعا تۇسىنىستىكپەن قاراپ، اينالىپ ءوتۋدىڭ بالاما جولدارىن الدىن الا جوسپارلاۋدى سۇرايدى، دەپ حابارلايدى "The Qazaq Times" الماتى قالاسىنىڭ ءىىد ءباسپاسوز-قىزمەتىنە سىلتەمە جاساپ.

2017 جىلدىڭ 25 قاڭتارىنان باستاپ قالاعا كىرەبەرىس ماگيسترالداردا، سونداي-اق ۋنيۆەرسيادانىڭ سپورتتىق نىساندارىنا ىرگەلەس جاتقان جولداردا جۇك جانە ءىرى گاباريتتى كولىكتەر قوزعالىسىنا شەكتەۋ قويىلادى. بۇگىندە مەگاپوليس اۋماعىندا ورنالاسقان پوليتسيانىڭ ستاتسيونارلىق بەكەتتەرىندە ءتۇتىنى مەن ۋىتتىلىعى ەكولوگيالىق نورماعا ساي ەمەس، اپاتتىق جانە تەحنيكالىق اقاۋلىعى اڭعارىلعان كولىك قۇرالدارىن انىقتاۋ جونىندە جۇمىستار كۇشەيتىلۋدە. وسى ماقساتتا مەملەكەتتىك كىرىستەر دەپارتامەنتى مەن بىرقاتار قۇقىققورعاۋ ورگاندارىنىڭ وكىلدەرى بۇل ىسكە قىزۋ كىرىسىپ تە كەتتى. وسى جۇمىسقا قالانىڭ 10 ستاتسيونارلىق پوليتسيا بەكەتتەرىنەن وزگە الماتى وبلىسىنىڭ وسى ىسپەتتەس 8 پوستى دا تارتىلعان.

سونىمەن بىرگە، پوليتسيا حابارلاماسىندا ايتىلعانداي، ۋنيۆەرسيادا سپورتتىق نىساندارى ورنالاسقان اۋماقتارعا باراتىن جولدارداعى قوزعالىستى شەكتەۋ شارالارى جول جاعدايىنا وڭ اسەرىن تيگىزىپ، سپورتشىلارعا، سونداي-اق شەتەلدىك دەلەگاتسيالاردىڭ ءجۇرىس-تۇرىسىنا قولايلى جاعدايلار تۋىنداتادى. ءتارتىپتىڭ ساقتالۋى ءوز كەزەگىندە ءوتىپ جاتقان الەمدىك شارا ەلىمىزدىڭ بەت-بەينەسىنە اسەر ەتىپ، تۇتاستاي العاندا، مەملەكەتىمىزدىڭ بەدەلىنىڭ ارتۋىنا دا يگى ىقپال جاسايدى.

الماتى قالاسىنىڭ ىشكى ىستەر دەپارتامەنتى زاڭدىلىقتى سىيلاپ، وعان مويىنسۇنعان جول قوزعالىسىنا قاتىسۋشىلارعا تۇسىنە بىلگەنى جانە ازاماتتىق كوزقاراسى ءۇشىن الدىن-الا العىس ايتادى.

ەسكەرتۋ: جول ءجۇرىسى جونىندەگى بالاما كەستە جاقىن ارالىقتا جاريالانادى.

"The Qazaq Times"