Foto: UGL Corporation

Qazaqstan jıl basınan beri şamamen 2 mlrd dollarğa 144 mln tonna tamaq önimin eksporttağan. Bwl turalı QR Investiciyalar jäne damu ministri Jeñis Qasımbek mälimdedi. 

Ministrdiñ sözinşe, otandıq önimder şetelde ülken swranısqa ie eken.

"Eksporttıñ jalpı kölemi 2 mlrd dollar nemese 145 mln tonna önimdi qwraydı. Öz kezeginde et jäne qws eti önimderin Auğanstanğa, Birikken Arab Ämirlikterine, Iranğa jetkizu bastaldı, ösimdik mayı men bal Qıtayğa jetkizilude. Farmacevtika önimderi boyınşa qalıptı dinamika bayqaladı, otandıq öndiruşilerdiñ önimderin jetkizu 34%-ğa, 19 mln dollarğa deyin östi. Bwdan bölek farmacevtikalıq preparattar men medicinalıq önimder Moñğoliya men V'etnamğa eksporttaldı", - dedi ol.

Ministr 2016 jılı  Qazaq Organic Food, KazMeat jäne Halal Kazakhstan brendteri qwrılğanın da atap ötti.

"Otandıq käsiporındar osı birıñğay brendter şeñberinde sırtqı narıqqa şoğırlana aladı. Qazirgi kezde qızığuşılıq tanıtqan organdarımen kelissözder jürgizilip, brendterdi damıtu üşin jol kartaları äzirlendi", - dedi vedomstvo basşısı.

Jeñis Qasımbektiñ sözinşe, Resey Qazaqstanda öñdelgen önimderdi satatın negizgi narıq bolıp qala beredi.

"Resey narığındağı jwmıstı küşeytip, qazaqstandıq önimderdiñ satılımı boyınşa 50-ge juıq is-şara jürgizildi, 100 mln dollarğa kelissöz jasaldı", - dedi ol.

Sonday-aq, jıl basınan beri Reseyde tek qazaqstandıq önimder satılatın 20-ğa juıq arnayı düken aşılğan.

Ayta keteyik, Qazaqstan işki narıqtı da, sırtqı narıqtı da öziniñ tamaq önimderimen qamtamasız ete aluı mümkin. Alayda öz tauarların eksporttaumen qatar, belsendi importtauşı. Sebebi memleket öndirilgen şikizatın eksporttağan künniñ özinde onı öñdelgen küyinde eki ese qımbatqa satıp aladı.

“The Qazaq Times”