فوتو: UGL Corporation

قازاقستان جىل باسىنان بەرى شامامەن 2 ملرد دوللارعا 144 ملن توننا تاماق ءونىمىن ەكسپورتتاعان. بۇل تۋرالى قر ينۆەستيتسيالار جانە دامۋ ءمينيسترى جەڭىس قاسىمبەك مالىمدەدى. 

ءمينيستردىڭ سوزىنشە، وتاندىق ونىمدەر شەتەلدە ۇلكەن سۇرانىسقا يە ەكەن.

"ەكسپورتتىڭ جالپى كولەمى 2 ملرد دوللار نەمەسە 145 ملن توننا ءونىمدى قۇرايدى. ءوز كەزەگىندە ەت جانە قۇس ەتى ونىمدەرىن اۋعانستانعا، بىرىككەن اراب امىرلىكتەرىنە، يرانعا جەتكىزۋ باستالدى، وسىمدىك مايى مەن بال قىتايعا جەتكىزىلۋدە. فارماتسەۆتيكا ونىمدەرى بويىنشا قالىپتى ديناميكا بايقالادى، وتاندىق وندىرۋشىلەردىڭ ونىمدەرىن جەتكىزۋ 34%-عا، 19 ملن دوللارعا دەيىن ءوستى. بۇدان بولەك فارماتسەۆتيكالىق پرەپاراتتار مەن مەديتسينالىق ونىمدەر موڭعوليا مەن ۆەتنامعا ەكسپورتتالدى", - دەدى ول.

مينيستر 2016 جىلى  Qazaq Organic Food, KazMeat جانە Halal Kazakhstan برەندتەرى قۇرىلعانىن دا اتاپ ءوتتى.

"وتاندىق كاسىپورىندار وسى بىرىڭعاي برەندتەر شەڭبەرىندە سىرتقى نارىققا شوعىرلانا الادى. قازىرگى كەزدە قىزىعۋشىلىق تانىتقان ورگاندارىمەن كەلىسسوزدەر جۇرگىزىلىپ، برەندتەردى دامىتۋ ءۇشىن جول كارتالارى ازىرلەندى", - دەدى ۆەدومستۆو باسشىسى.

جەڭىس قاسىمبەكتىڭ سوزىنشە، رەسەي قازاقستاندا وڭدەلگەن ونىمدەردى ساتاتىن نەگىزگى نارىق بولىپ قالا بەرەدى.

"رەسەي نارىعىنداعى جۇمىستى كۇشەيتىپ، قازاقستاندىق ونىمدەردىڭ ساتىلىمى بويىنشا 50-گە جۋىق ءىس-شارا جۇرگىزىلدى، 100 ملن دوللارعا كەلىسسوز جاسالدى", - دەدى ول.

سونداي-اق، جىل باسىنان بەرى رەسەيدە تەك قازاقستاندىق ونىمدەر ساتىلاتىن 20-عا جۋىق ارنايى دۇكەن اشىلعان.

ايتا كەتەيىك، قازاقستان ىشكى نارىقتى دا، سىرتقى نارىقتى دا ءوزىنىڭ تاماق ونىمدەرىمەن قامتاماسىز ەتە الۋى مۇمكىن. الايدا ءوز تاۋارلارىن ەكسپورتتاۋمەن قاتار، بەلسەندى يمپورتتاۋشى. سەبەبى مەملەكەت وندىرىلگەن شيكىزاتىن ەكسپورتتاعان كۇننىڭ وزىندە ونى وڭدەلگەن كۇيىندە ەكى ەسە قىمباتقا ساتىپ الادى.

“The Qazaq Times”