Foto: Habar 24

Qazaqstandağı şekara baqılauı küşeygendikten Qırğızstannıñ ekonomikalıq şığındarı 200 mln dollardan astı. Mwnday aqparattı qırğız ükimeti Halıqaralıq valyuta qorı mälimetterine negizdep jariyalap otır.

Qırğız tarapınıñ aqparatınşa, eldiñ delegaciyası Düniejüzilik sauda wyımınıñ Jeneva qalasında ötip jatqan tauarlardı saudalau jönindegi keñesine qatısqan. Kezdesu kezinde Qazaqstannıñ DSW-nıñ negizgi qağidattarın, yağni qolaylı jağday rejimderin, aşıqtıqtı qamtamasız etu turalı erejeni, sonday-aq tranzit principterin bwzğanı turalı aytılğan.

Kezdesuge qatısuşılardıñ sözinşe, bwl Qırğızstan ekonomikası ösiminiñ 0,3 payızğa tömendeuine äkep soğadı. Bwdan bölek olar Qazaqstannıñ mwnday äreketteri tek jük tasımalına ğana maqsattı türde qoldanılıp otır degendi aytadı.

Qazaqstandıq tarap bolsa, tekseru jwmıstarınıñ qatañdatıluı kontrabandamen, kontrafaktili tauarlarmen küres jwmıstarımen jäne  sanitarlıq jäne fitosanitarlıq talaptarmen baylanıstı ekenin mälimdegen.

Al Qırğızstan tarapı DSW-dan osı jağdaydı ob'ektivti türde bağalaudı swradı.

“The Qazaq Times”