قازاقستان شەكارا باقىلاۋىن كۇشەيتكەندىكتەن قىرعىزستاننىڭ شىعىنى كوبەيگەن

قىرعىز تاراپىنىڭ اقپاراتىنشا، ەلدىڭ دەلەگاتسياسى دۇنيەجۇزىلىك ساۋدا ۇيىمىنىڭ جەنەۆا قالاسىندا ءوتىپ جاتقان تاۋارلاردى ساۋدالاۋ جونىندەگى كەڭەسىنە قاتىسقان. كەزدەسۋ كەزىندە قازاقستاننىڭ دسۇ-نىڭ نەگىزگى قاعيداتتارىن، ياعني قولايلى جاعداي رەجيمدەرىن، اشىقتىقتى قامتاماسىز ەتۋ تۋرالى ەرەجەنى، سونداي-اق ترانزيت پرينتسيپتەرىن بۇزعانى تۋرالى ايتىلعان.

كەزدەسۋگە قاتىسۋشىلاردىڭ سوزىنشە، بۇل قىرعىزستان ەكونوميكاسى ءوسىمىنىڭ 0,3 پايىزعا تومەندەۋىنە اكەپ سوعادى. بۇدان بولەك ولار قازاقستاننىڭ مۇنداي ارەكەتتەرى تەك جۇك تاسىمالىنا عانا ماقساتتى تۇردە قولدانىلىپ وتىر دەگەندى ايتادى.

قازاقستاندىق تاراپ بولسا، تەكسەرۋ جۇمىستارىنىڭ قاتاڭداتىلۋى كونتراباندامەن، كونترافاكتىلى تاۋارلارمەن كۇرەس جۇمىستارىمەن جانە  سانيتارلىق جانە فيتوسانيتارلىق تالاپتارمەن بايلانىستى ەكەنىن مالىمدەگەن.

ال قىرعىزستان تاراپى دسۇ-دان وسى جاعدايدى وبەكتيۆتى تۇردە باعالاۋدى سۇرادى.

“The Qazaq Times”