Foto: kapital.kz

Qazan ayında Bank RBK öz twtınuşılarına jeke jäne korporativtik aqşasın aluğa belgili mölşerde şekteu qoyıp, depozittegi aqşalardı berudi toqtatqan. 11 qazan küni bank akcionerleriniñ biri Vladimir Kim mäseleni şeşu üşin Wlttıq Bankpen kelissöz jürgizip jatqanın habarlağan. Alayda, mäsele äli künge deyin oñ şeşimin tappay otır.

Osı jağday turalı  Qazaqstan wlttıq twtınuşılar ligasınıñ" basqarma törağası Svetlana Romanovskaya Astanada "Nwr Otan" partiyasınıñ keñeytilgen jiınında bayandap, prezidentten kömek beruin swrağan.

"Qazirgi uaqıtta RBK bankine qatıstı jağday uşığıp twr. Mausım ayınan bastap bank twtınuşıları, käsipkerler öz aqşalarına ielik ete almay otır. Biz bwl jağdaydı ädiletsizdik dep oylamız. Sizdiñ el üşin jasap jatqan barlıq eñbegiñizdi, sonımen qatar, ipoteka töleuşilerge de jasağan qamqorlığıñızdı bilemiz. Bizge, Bank RBK salımşılarına  da öz kömegiñizdi swraymız", - dedi ol.

Prezident Nwrswltan Nazarbaev Bank RBK-dağı jağdaydı "wrlıq" dep bağalap, bwl mäseleni öz nazarında ekenin aytıp ötti.  "Men bwl mäseleni jäne onda bolıp jatqan jağdaydı jaqsı bilemin. Bwl sol akcionerlerdiñ wrlığı. Biz barlıq jağdaydı rettep, wrılardı özderiniñ tiisti ornına otırğızamız. Bank qoldanuşılardıñ aqşasın keri qaytaruğa jağday jasaymız. Qazirgi uaqıtta, Wlttıq bank osı jaytqa qatıstı jwmıstar jasap jatır", - dedi Prezident.

Äzirge bankten wrlanğan qarjı turalı ne aqparat,  ne sot şeşimi jariyalanğan joq.

Madina Kerimqwlova

“The Qazaq Times”