فوتو: kapital.kz

قازان ايىندا Bank RBK ءوز تۇتىنۋشىلارىنا جەكە جانە كورپوراتيۆتىك اقشاسىن الۋعا بەلگىلى مولشەردە شەكتەۋ قويىپ، دەپوزيتتەگى اقشالاردى بەرۋدى توقتاتقان. 11 قازان كۇنى بانك اكتسيونەرلەرىنىڭ ءبىرى ۆلاديمير كيم ماسەلەنى شەشۋ ءۇشىن ۇلتتىق بانكپەن كەلىسسوز جۇرگىزىپ جاتقانىن حابارلاعان. الايدا، ماسەلە ءالى كۇنگە دەيىن وڭ شەشىمىن تاپپاي وتىر.

وسى جاعداي تۋرالى  قازاقستان ۇلتتىق تۇتىنۋشىلار ليگاسىنىڭ" باسقارما توراعاسى سۆەتلانا رومانوۆسكايا استانادا "نۇر وتان" پارتياسىنىڭ كەڭەيتىلگەن جيىنىندا بايانداپ، پرەزيدەنتتەن كومەك بەرۋىن سۇراعان.

"قازىرگى ۋاقىتتا RBK بانكىنە قاتىستى جاعداي ۋشىعىپ تۇر. ماۋسىم ايىنان باستاپ بانك تۇتىنۋشىلارى، كاسىپكەرلەر ءوز اقشالارىنا يەلىك ەتە الماي وتىر. ءبىز بۇل جاعدايدى ادىلەتسىزدىك دەپ ويلامىز. ءسىزدىڭ ەل ءۇشىن جاساپ جاتقان بارلىق ەڭبەگىڭىزدى، سونىمەن قاتار، يپوتەكا تولەۋشىلەرگە دە جاساعان قامقورلىعىڭىزدى بىلەمىز. بىزگە، Bank RBK سالىمشىلارىنا  دا ءوز كومەگىڭىزدى سۇرايمىز", - دەدى ول.

پرەزيدەنت نۇرسۇلتان نازارباەۆ Bank RBK-داعى جاعدايدى "ۇرلىق" دەپ باعالاپ، بۇل ماسەلەنى ءوز نازارىندا ەكەنىن ايتىپ ءوتتى.  "مەن بۇل ماسەلەنى جانە وندا بولىپ جاتقان جاعدايدى جاقسى بىلەمىن. بۇل سول اكتسيونەرلەردىڭ ۇرلىعى. ءبىز بارلىق جاعدايدى رەتتەپ، ۇرىلاردى وزدەرىنىڭ ءتيىستى ورنىنا وتىرعىزامىز. بانك قولدانۋشىلاردىڭ اقشاسىن كەرى قايتارۋعا جاعداي جاسايمىز. قازىرگى ۋاقىتتا، ۇلتتىق بانك وسى جايتقا قاتىستى جۇمىستار جاساپ جاتىر", - دەدى پرەزيدەنت.

ازىرگە بانكتەن ۇرلانعان قارجى تۋرالى نە اقپارات،  نە سوت شەشىمى جاريالانعان جوق.

مادينا كەرىمقۇلوۆا

“The Qazaq Times”