Foto: akorda.kz

Qazaqstan Respublikasınıñ Wlttıq Bankine «Rothschild & Co» kompaniyası keñes beredi.

Qaraşa ayınıñ 1-i küni Qazaqstan prezidenti Nwrswltan Nazarbaev «Rothschild & Co» kompaniyasınıñ basşıları Erik de Rotşil'd, Klaus Mangol'd jäne Jovanni Salvettimen kezdesti. Kezdesu barısında Nazarbaev: « «Rotşil'd» kompaniyası – älemdegi erteden kele jatqan iri qarjı instituttardıñ biri. Sizderdiñ jeke kapital salımşılarmen jwmıs jönindegi täjiribeleriñiz mol. Bwl täjiribe bizdiñ elimiz üşin de mañızdı. Sol sebepti qazir Qazaqstannıñ Wlttıq bankine keñes berip otırsızdar» - degen.

Öz kezeginde «Rothschild & Co» kompaniyasınıñ basşısı Erik de Rotşil'd Nwrswltan Nazarbaevqa özimen kezdesuge mümkindik bergenine rahmet aytıp, «Bwl – meniñ Qazaqstanğa alğaş ret keluim. Soñğı eki kündegi äserlerim öte jaqsı. Sizdiñ arqañızda bolaşaqta eliñiz joğarı qarqınmen damitın boladı. Qazaqstan geografiyalıq twrğıdan wtımdı jerde ornalasqan. Ol Aziya men Europa arasındağı köpir bolıp sanaladı. Sizdiñ ekonomikanı ärtaraptandıruğa, önerkäsipti damıtuğa jäne şikizattıq ekonomikadan bas tartuğa jetelegen ürdisterdi ayqınday alğan köregen qadamıñız meni tänti etti» - degen.

Rodşil'd äuletiniñ bank salasındağı tarihı XVIIİ ğasırdan bastau aladı. 1816 jılı Avstriya imperatorı Franc İİ Rodşil'dterge baron atağın bergen. 1744-1812 jıldarı ömir sürgen Mayer Amşel' Rodşil'd alğaş ret Frankfurt qalasında «Frankfurte-de-Mayne» bankin aşqan. Keyinen onıñ jwmısın Parij, London, Vena jäne Frankfurt qalalarında Amşel' Mayer, Solomon Mayer, Natan Mayer, Kalman Mayer jäne Jeyms Mayer esimdi bes wlı jalğastırğan. Qazirgi tañda Natan Mayerden tarağan Rodşil'd wrpaqtarı Wlıbritaniyada, al Jeyms Mayerden tarağan Rodşil'dter Franciyada äulet isin jalğastıruda. Al Nwrswltan Nazarbaevpen kezdesken Erik de Rodşil'dke keletin bolsaq, ol 1940 jılı 3 qazan küni AQŞ-tıñ N'yu-York qalasında düniege kelgen. Erik franciyalıq Rodşil'dtardan tarağan mecenat, baron jäne biznesmen.

 “The Qazaq Times”