فوتو: akorda.kz

قازاقستان رەسپۋبليكاسىنىڭ ۇلتتىق بانكىنە «Rothschild & Co» كومپانياسى كەڭەس بەرەدى.

قاراشا ايىنىڭ 1-ءى كۇنى قازاقستان پرەزيدەنتى نۇرسۇلتان نازارباەۆ «Rothschild & Co» كومپانياسىنىڭ باسشىلارى ەريك دە روتشيلد، كلاۋس مانگولد جانە جوۆانني سالۆەتتيمەن كەزدەستى. كەزدەسۋ بارىسىندا نازارباەۆ: « «روتشيلد» كومپانياسى – الەمدەگى ەرتەدەن كەلە جاتقان ءىرى قارجى ينستيتۋتتاردىڭ ءبىرى. سىزدەردىڭ جەكە كاپيتال سالىمشىلارمەن جۇمىس جونىندەگى تاجىريبەلەرىڭىز مول. بۇل تاجىريبە ءبىزدىڭ ەلىمىز ءۇشىن دە ماڭىزدى. سول سەبەپتى قازىر قازاقستاننىڭ ۇلتتىق بانكىنە كەڭەس بەرىپ وتىرسىزدار» - دەگەن.

ءوز كەزەگىندە «Rothschild & Co» كومپانياسىنىڭ باسشىسى ەريك دە روتشيلد نۇرسۇلتان نازارباەۆقا وزىمەن كەزدەسۋگە مۇمكىندىك بەرگەنىنە راحمەت ايتىپ، «بۇل – مەنىڭ قازاقستانعا العاش رەت كەلۋىم. سوڭعى ەكى كۇندەگى اسەرلەرىم وتە جاقسى. ءسىزدىڭ ارقاڭىزدا بولاشاقتا ەلىڭىز جوعارى قارقىنمەن داميتىن بولادى. قازاقستان گەوگرافيالىق تۇرعىدان ۇتىمدى جەردە ورنالاسقان. ول ازيا مەن ەۋروپا اراسىنداعى كوپىر بولىپ سانالادى. ءسىزدىڭ ەكونوميكانى ارتاراپتاندىرۋعا، ونەركاسىپتى دامىتۋعا جانە شيكىزاتتىق ەكونوميكادان باس تارتۋعا جەتەلەگەن ۇردىستەردى ايقىنداي العان كورەگەن قادامىڭىز مەنى ءتانتى ەتتى» - دەگەن.

رودشيلد اۋلەتىنىڭ بانك سالاسىنداعى تاريحى ءXVIIى عاسىردان باستاۋ الادى. 1816 جىلى اۆستريا يمپەراتورى فرانتس ءىى رودشيلدتەرگە بارون اتاعىن بەرگەن. 1744-1812 جىلدارى ءومىر سۇرگەن مايەر امشەل رودشيلد العاش رەت فرانكفۋرت قالاسىندا «فرانكفۋرتە-دە-ماينە» بانكىن اشقان. كەيىنەن ونىڭ جۇمىسىن پاريج، لوندون، ۆەنا جانە فرانكفۋرت قالالارىندا امشەل مايەر، سولومون مايەر، ناتان مايەر، كالمان مايەر جانە جەيمس مايەر ەسىمدى بەس ۇلى جالعاستىرعان. قازىرگى تاڭدا ناتان مايەردەن تاراعان رودشيلد ۇرپاقتارى ۇلىبريتانيادا، ال جەيمس مايەردەن تاراعان رودشيلدتەر فرانتسيادا اۋلەت ءىسىن جالعاستىرۋدا. ال نۇرسۇلتان نازارباەۆپەن كەزدەسكەن ەريك دە رودشيلدكە كەلەتىن بولساق، ول 1940 جىلى 3 قازان كۇنى اقش-تىڭ نيۋ-يورك قالاسىندا دۇنيەگە كەلگەن. ەريك فرانتسيالىق رودشيلدتاردان تاراعان مەتسەنات، بارون جانە بيزنەسمەن.

 “The Qazaq Times”