Foto: Kazinform

Qazaqstanda zeynetaqı jinaqtarı boyınşa kiristiñ tım tömen boluına jäne zeynetaqı esebinen bolatın jasırın qarjılandıru äreketterine jol bermeu kerek. Mäjilis deputatı Ayqın Qoñırov osılay mälimdedi.

Ol Wlttıq bank törağası Daniyar Aqışev pen Qarjı ministri Baqıt Swltanovğa joldağan deputattıq saualında eldegi azamattardıñ zeynetaqı jinaqtarı boyınşa kiris tömen ekenin jäne  inflyaciya deñgeyi odan joğarı ekenin aytqan.

"Osı jıldıñ üş toqsanında BJZQ-dağı zeynetaqı jinaqtarınıñ jalpı soması 7,5 trln teñgege jetti, al jalpı investiciyalıq tabıs - 462 mlrd teñge. Osılayşa kiris deñgeyi 6,1% bolıp otır, osı kezeñdegi inflyaciya 7,1%-ğa jetti. Teñgeniñ aytarlıqtay älsiregenin jäne türli janarmay otındarınıñ qımbattağanın esepke alar bolsaq, infyaciya men zeynetaqı jinağınıñ kirisi arasındağı ayırmaşılıq wlğaya beredi", - dedi Qoñırov.

Ol aytıp ötkendey, zeynetaqı jinaqtarın inflyaciyadan qorğauğa zañnama boyınşa kepildik bar. Alayda qazirgi kezdegi qoldanıstığı erejege säykes ötemaqı töleu investiciyalıq tabıs pen inflyaciya arasındağı ayırmaşılıqtan joğarı bolıp otırğan joq.

"Bastapqı kezde zeynetaqı jüyesinde zeynetaqı jinaqtarınıñ nöldik investiciyalıq kirisi principi belgilengen. Alayda BJZQ kiristi wlğaytuğa ıntalanıp otırğan joq, öytkeni olardıñ kirisi inflyaciya deñgeyinen qalıp qoyğan künniñ özinde memlekettik byudjetpen öteledi", - deydi deputat.

Qoñırovtıñ sözinşe, salımşılar qarjısı qarız aluşılardıñ belgili bir toptarına tömendetilgen mölşerlememen berilgendikten, zeynetaqı jinaqtarınıñ investiciyalıq kirisi tömen boluı mümkin.

Osı sebepti mäjilismen ükimetten BJZQ-nıñ 2014-2017 jıldarğa arnalğan investiciyalıq kiristeri jäne sol kezeñdegi inflyaciya ötemaqısı boyınşa zeynetaqı jinaqtarına byudjetten tölengen kepildik tölemderi turalı aqparattar berudi swradı.

Ayta keteyik, zeynetaqı jinaqtarına qatıstı dau Qazaqstanda jıl ötken sayın köbeyip keledi. Memleket tarapınan kepildik bar degen künniñ özinde, qazirgi kezde qazaqstandıqtar zeynetaqı qorına senuden qalğan.

“The Qazaq Times”