Foto: 24.kg

Qırğızstan aqsaqaldarı el prezidenti Almazbek Atambaevtan «Respublika Ata-Jwrt» partiyasınıñ basşısı Ömirbek Babanov pen Talas oblısı jäne Qazaqstan halqınan keşirim swraudı talap etti.

Bügin Talas oblısınıñ aqsaqaldarı Bişkek qalasına bitimgerşilik delegaciyasın bastap keldi. Olardıñ sözinşe, 15-şi qazan küni ötken prezident saylauınan keyin, Talas oblısınıñ halqı saylau nätijesimen kelispeytindikterin aytıp beybit şeru ötkizgen. Şeruge el prezidenti atınan kelgen Dair Kenekeev halıqqa tüsindiru jwmıstarın jürgizudiñ ornına belgisiz sebeptermen halıq aldında «Manas» jırınan üzindiler oqıp ketken. Biraq şeruge jinalğan jwrt onı tıñdamağan. Osıdan keyin Almazbek Atambaev Talas halqın Manas batırdı sıylamaytın Şığıs wrpaqtarı dep sınğa alğan. Ol osı sözderiniñ arasında prezidenttikke ümitker bolğan Ömirbek Babanovtı da sınaymın dep Qazaqstanğa da til tigizip ketken. Talas oblısı aqsaqaldarınıñ oyınşa, Atambaev öziniñ osınday mälimdemeleri arqılı el halqın aymaqaralıq jäne wltaralıq qaqtığısqa itermeleude.

Ayta ketetin bir jayt, Qırğızstanda 2010 jılı ötken säuir revolyuciyası men Bakiev klanına qarsı köterilis däl osı Talas oblısınan bastalğan bolatın. Bir qızığı jeti jıl bwrın Almazbek Atambaev jaqtastarın qoldap şıqqan Talas oblısı halqı osı jolğı saylauda Atambaev mwrageri Jeenbekovtı emes Ömirbek Babanovtı qoldağan. Oğan oblıs halqınıñ 86 payızı dauıs bergen.

“The Qazaq Times”