فوتو: 24.kg

قىرعىزستان اقساقالدارى ەل پرەزيدەنتى المازبەك اتامباەۆتان «رەسپۋبليكا اتا-جۇرت» پارتياسىنىڭ باسشىسى ومىربەك بابانوۆ پەن تالاس وبلىسى جانە قازاقستان حالقىنان كەشىرىم سۇراۋدى تالاپ ەتتى.

بۇگىن تالاس وبلىسىنىڭ اقساقالدارى بىشكەك قالاسىنا بىتىمگەرشىلىك دەلەگاتسياسىن باستاپ كەلدى. ولاردىڭ سوزىنشە، 15-ءشى قازان كۇنى وتكەن پرەزيدەنت سايلاۋىنان كەيىن، تالاس وبلىسىنىڭ حالقى سايلاۋ ناتيجەسىمەن كەلىسپەيتىندىكتەرىن ايتىپ بەيبىت شەرۋ وتكىزگەن. شەرۋگە ەل پرەزيدەنتى اتىنان كەلگەن داير كەنەكەەۆ حالىققا ءتۇسىندىرۋ جۇمىستارىن جۇرگىزۋدىڭ ورنىنا بەلگىسىز سەبەپتەرمەن حالىق الدىندا «ماناس» جىرىنان ۇزىندىلەر وقىپ كەتكەن. بىراق شەرۋگە جينالعان جۇرت ونى تىڭداماعان. وسىدان كەيىن المازبەك اتامباەۆ تالاس حالقىن ماناس باتىردى سىيلامايتىن شىعىس ۇرپاقتارى دەپ سىنعا العان. ول وسى سوزدەرىنىڭ اراسىندا پرەزيدەنتتىككە ۇمىتكەر بولعان ومىربەك بابانوۆتى دا سىنايمىن دەپ قازاقستانعا دا ءتىل تيگىزىپ كەتكەن. تالاس وبلىسى اقساقالدارىنىڭ ويىنشا، اتامباەۆ ءوزىنىڭ وسىنداي مالىمدەمەلەرى ارقىلى ەل حالقىن ايماقارالىق جانە ۇلتارالىق قاقتىعىسقا يتەرمەلەۋدە.

ايتا كەتەتىن ءبىر جايت، قىرعىزستاندا 2010 جىلى وتكەن ءساۋىر رەۆوليۋتسياسى مەن باكيەۆ كلانىنا قارسى كوتەرىلىس ءدال وسى تالاس وبلىسىنان باستالعان بولاتىن. ءبىر قىزىعى جەتى جىل بۇرىن المازبەك اتامباەۆ جاقتاستارىن قولداپ شىققان تالاس وبلىسى حالقى وسى جولعى سايلاۋدا اتامباەۆ مۇراگەرى جەەنبەكوۆتى ەمەس ومىربەك بابانوۆتى قولداعان. وعان وبلىس حالقىنىڭ 86 پايىزى داۋىس بەرگەن.

“The Qazaq Times”