Almatıda «Er Jänibek» halıqaralıq qoğamdıq qorınıñ wyımdastıruımen şağın futboldan dästürli «ER JANIBEK CUP-2017» halıqaralıq turniri ötedi. Biılğı kubok belgili ğalım, filologiya ğılımdarınıñ doktorı, professor Twrsınbek Käkişevtiñ 90 jıldıq mereytoyına jäne Alaş Orda qozğalısınıñ 100 jıldığına arnalıp otır. 

Şağın futboldan ötetin halıqaralıq turnirdiñ maqsatı –  Qazaq ädebieti ğılımına ölşeusiz üles qosqan zerdeli ğalım, qazaq ädebieti sınınıñ körnekti ökili, filologiya ğılımdarınıñ doktorı, professor Twrsınbek Käkişevtıñ eñbegi men önegeli ömirin jastarğa ülgi etu. Sonday-aq, şetelde twratın qazaq jastarına Täuelsiz qazaq eliniñ  tınıs-tirşiligin tanıstıru, sporttıq oyın arqılı atajwrtımen mädeni-ruhani baylanısın nığaytudı maqsat etedi. .

QR Prezidenti N.Ä.Nazarbaev  Düniejüzi qazaqtarınıñ V qwrıltayında älemdegi barşa qazaqtıñ bekem birligi turalı aytqan edi. Elbası bwl taqırıptı «Bolaşaqqa bağdar: ruhani jañğıru» maqalasında da tereñ qozğağan bolatın. Osı orayda, «Er Jänibek» halıqaralıq qoğamdıq qorı memleket basşısısı atap körsetken mañızdı bağıttarğa ün qosudı közdeydi.

«Er Jänibek» halıqaralıq qoğamdıq qorınıñ «ER JANIBEK CUP» turniri  - biıl İİİ ret ötkizilgeli otır. 24 komanda baq sınaytın jarıstıñ jülde qorı - 2 million teñge. Düniejüzi qazaq jastarın şaqırğan futbol turnirine Franciya, Türkiya, Qıtay, Resey (Ombı, Saratov qalalarınan), Moñğoliya, Iran, Özbekstan jäne Qırğızstanda twratın qazaq jastarınan qwralğan futbol komandaları qatısadı. Sonımen qatar, Almatı men Astana qalalarınan jäne elimizdiñ är oblısınan keletin sportşılar oyın körsetedi.

Turnirge Düniejüzi qazaqtarı qauımdastığı, QR Mädeniet jäne sport ministrligi, Almatı qalası äkimdigi, äl-Farabi atındağı Qazaq wlttıq universiteti qoldau körsetip otır. Turnir kezinde şağın etnoauıl tigilip, qolöner körmesi ötedi.

Ötetin ornı: äl-Farabi atındağı QazWU-dıñ sport keşeni.

Uaqıtı: 21-22 qazan 2017 jıl.

Turnirdiñ aşıluı:  21 qazan 2017j. 10:00-de.

Jeñimpazdardı marapattau: 22 qazan 2017 j. 17:00-de.

Baylanıs telefonı: +7 702-121-21-51,+ 7 702-566-00-10.

“The Qazaq Times”