Almatı qalasında «Er Jänibek» halıqaralıq qoğamdıq qorınıñ wyımdastıruımen şağın futboldan ötken dästürli «ER JANIBEK CUP-2017» halıqaralıq turniri märesine jetti. Biılğı turnir belgili ğalım, filologiya ğılımdarınıñ doktorı, professor Twrsınbek Käkişevtiñ 90 jıldıq mereytoyına arnaldı.

Oyınnıñ birinşi küngi qorıtındısı boyınşa, ekinşi kezeñge "Qazaq Stambwl" (Türkiya), "Ämir" (Resey, Saratov qalası), "Bayölke" (Moñğoliya), "Dastan" (Iran), "NFC Kazakhstan Pavlodar" (Qazaqstan, Pavlodar), "Birlik-Keruen" (Almatı),  "Ğafur" (Almatı), "Alatau" (Almatı) futbol komandaları (FK) joldama aldı.

"Birlik Keruen" men "NFC Kazakhstan Pavlodar" arasındağı oyın. Foto: QT

Ekinşi küngi oyında  jartılay finalda "NFC Kazakhstan Pavlodar" men "Ämir" oynap, 4:1 esebimen  "NFC Kazakhstan Pavlodar" finalğa şıqtı. Al "Birlik-Keruen" men "Bayölke" arasında bolğan oyında 6:1 esebimen "Birlik-Keruen" finalğa ötti.

Üşinşi orınğa talasta "Ämir" FK "Bayölke" FK-nı jeñip, 300 mıñ teñgeni qanjığasına bayladı. Al "Bayölke" FK-na 200 mıñ teñge sıyaqı berildi.

Al finalğa şıqqan "Birlik Keruen" men "NFC Kazakhstan Pavlodar" arasındağı oyın 3:2 esebimen ayaqtalıp, «ER JANIBEK CUP-2017» halıqaralıq turniriniñ kubogine jäne 1 mln teñge qarjılay sıyaqığa "Birlik Keruen" FK-sı ie boldı.  "NFC Kazakhstan Pavlodar"  komandasına 500 mıñ teñge sıyaqı berildi.

Jeñiske jetken "Birlik Keruen" FK jäne turnirdi wyımdastıruşılar. Foto: QT

"Biz bwl turnirge köp dayındaldıq. Bıltır qatısıp esemizdi jiberip alğan edik. Al biıl wttıq. Bäri jigitterdiñ küş-jigeri. Al turnir joğarı deñgeyde ötti. Bwrın tek şetelden kelgen qazaqtar arasında ötetin. Biıl jergilikti komandalar qosılıp otır. Osı sebepti de turnir qızıqtı ötti", - dedi jeñiske jetken "Birlik Keruen" FK-nıñ negizin qwruşı Manat Mağaz.

«Baqkeldi — 2012» JŞS-niñ direktorı, käsipker Tolqın Aqanwlı kubok jüldesin tağayındadı. Foto: QT

Sonday-aq, 4 orın alğan "Bayölke" komandasına Ğılımhan Qaliwlı, 3 orın alğan "Ämirge" Sırımbek Tau, 2 orın alğan "NFC Kazakhstan Pavlodar" komandasına Aysa Orazhan sıylıqtar tabıstadı.

Bwdan bölek,  «Er Jänibek» halıqaralıq qoğamdıq qorınıñ tağayındauımen üzik oyın körsetken "NFC Kazakhstan Pavlodar" FK-nıñ oyınşısı Asqar Ajikov "Swrmergen", "Qazaq Stambwl"  FK-nıñ oyınşısı Janer Ahmet Bozqwrt "Üzdik şabuılşı", "Ämir" FK-nıñ qaqpaşısı Ruslan Maştakov "Üzdik qaqpaşı" jäne "Namıs" FK-nıñ (Resey, Ombı) oyınşısı Nurahmet Nigmanov "Üzdik qorğauşı" nominaciyaların jeñip aldı.

"NFC Kazakhstan Pavlodar" FK-nıñ oyınşısı Asqar Ajikov "Swrmergen" nominaciyasına ie boldı. Foto: QT

Sonday-aq, Twrsınbek Käkişev atındağı arnayı "Eldik ruh" sıylığı Franciyadan kelgen "Parij Kazakh sport" FK-ğa jäne Qırğızstannan kelgen "Alaş" FK-ğa berildi.

Qırğızstannan kelgen "Alaş" FK- jetekşisi E.Bulekbaev "Eldik ruh" sıylığın aldı. Foto: QT

Alıstan at arıtıp kelgen qazaq komandaları turnirdiñ jabılu saltanatında qoğamdıq qorğa jäne wyımdastıruşılarğa rahmetin ayttı.

"Bar ömirin qazaq ädebietine arnağan Twrsınbek Käkişevtiñ 90 jıldığına arnalğan "Er Jänibek" halıqaralıq qorınıñ futbol turniri qwttı bolsın. Bizdi "şeteldegi qandastarımız" dep bauırına basıp jatır. Sondıqtan Franciya qazaqtarı atınan osı şaranı wyımdastıruğa at salısqan barlıq azamattarğa alğıs aytamız", - dedi Parijdegi qazaq mädeni ortalığınıñ jäne "Parij Kazakh sport" FK jetekşisi Täbärik Doolu.

"Bügingi oyın öte ädemi boldı. Oyın ädil, sätti ötti. Turnirdi wyımdastırğan ağalarımızğa alğısımız şeksiz. Endi kelesi jılı wyımdastırılsa, bwdan da jaqsı oyın körsetuge talpınamız", - dedi  Monğoliyadan kelip, 4 orın alğan "Bayölke" FK-nıñ kapitanı Ertis Bolatwlı.

Moñğoliyadan kelgen "Bayölke" FK. Foto: QT

Jeñimaz komandağa kubok tapsırğan "Er Jänibek" halıqaralıq qoğamdıq qorınıñ prezidenti Jeñis Türkiya söz soñında barlıq qatısuşı komandalarğa alğısın bildirdi.

"Bügin "Er Jänibek" qorınıñ halıqaralıq turniri  qazaqtıñ ğalımı, abızı Twrsınbek Käkişev ağamızdıñ 90 jıldığına arnalıp otır. Alıstan at arıtıp, osınday turnirge qatısuğa kelgenderiñiz üşin şeksiz rahmet aytamın. Kelesi turnirde kezdeskenşe", - dep tüyindedi Jeñis Türkiya.

"Er Jänibek" halıqaralıq qoğamdıq qorınıñ prezidenti Jeñis Türkiya "Birlik Keruen" FK-ğa turnir kubogin tabıstadı. Foto: QT

Ayta keteyik, «ER JANIBEK CUP-2017» halıqaralıq turniri 21 qazan küni bastalğan. Jarısqa şetelden kelgen "Qazaq Stambwl" (Türkiya), Ämir" (Resey, Saratov qalası), "Üştas" (Qıtay, Beyjiñ) "Parij Kazakh sport" (Franciya, Parij), "Namıs" (Resey, Ombı qalası), "Bayölke" (Moñğoliya), "Alaş" (Qırğızstan), "Dastan" (Iran) komandaları jäne Qazaqstannan  komandaları, sonday-aq, Almatı qalasınan  "Birlik-Keruen", "Sauır", "Erentau", "Üşqoñır", "Besqala", "Barıs", "Alatau", "Ğafur" komandaları qatıstı.

Turnirde tüsirilgen fotocuretterdi mına siltemeden aluğa boladı.

“The Qazaq Times”