"IM" lideri äl-Bağdadi. Foto: lapresse.ca-.

Özderin «Islam Memleketi» dep atağan terrorlıq wyım lideri Äbu Bäkra äl-Bağdadidıñ atınan tağı bir audio jariyalandı. Äl-Bağdadiğa wqsas dauıspen söylegen adam, Soltüstik Koreyanıñ AQŞ pen Japoniyağa qaratqan qorqıtu sözderi turalı pikir bildiredi. Sonımen birge «Islam memleketi» wyımınıñ negizgi ortalığı bolğan Mosul qalasında bolğan şayqas turalı eskertu jasağan. Bwl turalı BBC- diñ onlayn qızmeti habarladı.

AQŞ biligi äl-Bağdadidıñ basına 25 mln AQŞ dolların tikken edi. Onı 2014 jıldıñ mausım ayınan beri eşkim körmegen. Osınıñ özi ol turalı türli boljamdardıñ tuuına sebep boldı. Biraq, 2017 jıldıñ mausım ayında Resey Qorğanıs ministriligi taratqan mälimette, atalğan toptıñ atamanı äl-Bağdadi Rakka qalası mañına 28 mamır küni jasalğan bir retki äue şabuıldan ölgen boluı mümkin degen bolatın. Degenmen, oğan deyin de «IM» atamanınıñ öltirilgeni turalı birneşe ret mälimet taratılğan edi. Biraq bäri de tolıqtay rastalğan emes.

Al, äl-Bağdadi eñ soñğı ret Mosul qalasın «IM» wyımı basıp alğan uaqıtta, än-Nuri meşitindegi namazdan keyin jwrt aldına şığıp, top lideri retinde söz söylegen. Onıñ bwl soñğı mälimetinen beri üş jıl uaqıt ötti. Al, äl-Bağdadi atınan jazıp alınğan soñğı audiojazba ötken jıldıñ qaraşa ayında, Irak ükimet armiyası Mosul qalasın qaytarıp alu şayqasın bastağan twsta taralğan edi. «Islam memleketi» wyımınıñ Süriya men Iraktan basıp alğan negizgi qalaları men bekinisteri osı jıldıñ mausım ayı kezine qaytarılıp alınğan edi.

46 minutqa sozılğan bwl retki audiojazba, atalğan wyımmen qatısı bar dep tanılğan sayttıñ birine jariyalanğan. äl-Bağdadi Süriya men Irak şekarası mañındağı «IM» wyımı baqılauında twrğan aymaqta jasırınğan boluı mümkin degen boljam bar.

“The Qazaq Times”