«يسلام مەملەكەتى» تەررورلىق ۇيىمىنىڭ ليدەرى ءتىرى ەكەنىن ءبىلدىرىپ اۋديو جاريالادى

وزدەرىن «يسلام مەملەكەتى» دەپ اتاعان تەررورلىق ۇيىم ليدەرى ءابۋ باكرا ءال-باعداديدىڭ اتىنان تاعى ءبىر اۋديو جاريالاندى. ءال-باعداديعا ۇقساس داۋىسپەن سويلەگەن ادام، سولتۇستىك كورەيانىڭ اقش پەن جاپونياعا قاراتقان قورقىتۋ سوزدەرى تۋرالى پىكىر بىلدىرەدى. سونىمەن بىرگە «يسلام مەملەكەتى» ۇيىمىنىڭ نەگىزگى ورتالىعى بولعان موسۋل قالاسىندا بولعان شايقاس تۋرالى ەسكەرتۋ جاساعان. بۇل تۋرالى BBC- ءدىڭ ونلاين قىزمەتى حابارلادى.

اقش بيلىگى ءال-باعداديدىڭ باسىنا 25 ملن اقش دوللارىن تىككەن ەدى. ونى 2014 جىلدىڭ ماۋسىم ايىنان بەرى ەشكىم كورمەگەن. وسىنىڭ ءوزى ول تۋرالى ءتۇرلى بولجامداردىڭ تۋىنا سەبەپ بولدى. بىراق، 2017 جىلدىڭ ماۋسىم ايىندا رەسەي قورعانىس مينيسترىلىگى تاراتقان مالىمەتتە، اتالعان توپتىڭ اتامانى ءال-باعدادي راككا قالاسى ماڭىنا 28 مامىر كۇنى جاسالعان ءبىر رەتكى اۋە شابۋىلدان ولگەن بولۋى مۇمكىن دەگەن بولاتىن. دەگەنمەن، وعان دەيىن دە «يم» اتامانىنىڭ ولتىرىلگەنى تۋرالى بىرنەشە رەت مالىمەت تاراتىلعان ەدى. بىراق ءبارى دە تولىقتاي راستالعان ەمەس.

ال، ءال-باعدادي ەڭ سوڭعى رەت موسۋل قالاسىن «يم» ۇيىمى باسىپ العان ۋاقىتتا، ءان-نۋري مەشىتىندەگى نامازدان كەيىن جۇرت الدىنا شىعىپ، توپ ليدەرى رەتىندە ءسوز سويلەگەن. ونىڭ بۇل سوڭعى مالىمەتىنەن بەرى ءۇش جىل ۋاقىت ءوتتى. ال، ءال-باعدادي اتىنان جازىپ الىنعان سوڭعى اۋديوجازبا وتكەن جىلدىڭ قاراشا ايىندا، يراك ۇكىمەت ارمياسى موسۋل قالاسىن قايتارىپ الۋ شايقاسىن باستاعان تۇستا تارالعان ەدى. «يسلام مەملەكەتى» ۇيىمىنىڭ ءسۇريا مەن يراكتان باسىپ العان نەگىزگى قالالارى مەن بەكىنىستەرى وسى جىلدىڭ ماۋسىم ايى كەزىنە قايتارىلىپ الىنعان ەدى.

46 مينۋتقا سوزىلعان بۇل رەتكى اۋديوجازبا، اتالعان ۇيىممەن قاتىسى بار دەپ تانىلعان سايتتىڭ بىرىنە جاريالانعان. ءال-باعدادي ءسۇريا مەن يراك شەكاراسى ماڭىنداعى «يم» ۇيىمى باقىلاۋىندا تۇرعان ايماقتا جاسىرىنعان بولۋى مۇمكىن دەگەن بولجام بار.

“The Qazaq Times”